Մեր ճակատի գիրը մենք պիտի գրենք

Ժամանակն է` գրենք մեր ճակատի գիրը, որ ուրիշները չգրեն, որովհետև ինչ էլ որ գրել են ուրիշները մինչև հիմա, ի վնաս մեզ է եղել

ՍՈՍ ՍԱՐԳՍՅԱՆ

Արցախում դրսից եկածների հանդեպ հաճախ ավելի հյուրընկալ են լինում. Արտակ Բեգլարյան

am
Arts`akhowm drsits` ekatsneri handep hachakh aveli hyowrenkal en linowm. Artak Beglaryan_52110

Հայաստանի քաղաքացի Ասյա Խաչատրյանի եւ Արցախի իրավապահ մարմինների միջեւ Արցախում վերջերս տեղի ունեցած միջադեպը շարունակում է քննարկման առարկա մնալ: Ինչպես հայտնի է՝ Արցախի մայրաքաղաք Ստեփանակերտում մոտ մեկ ամիս առաջ ոստիկանները Երեւանից գնացած եւ Ստեփանակերտում որոշ ժամանակ աշխատած Ասյա Խաչատրյանին ոստիկանություն են հրավիրել եւ հարցաքննության ենթարկել, որից հետո խուզարկել են նրա բնակարանը, ինչի ընթացքում շահարկվել է աղջկա արտաքին տեսքը, ծխելու, գարեջուր օգտագործելու եւ այլ հանգամանքներ: Ասյա Խաչատրյանը աղմուկ է բարձրացրել՝ դիմելով համապատասխան մարմիններին: Այս թեմայի քննարկումների ընթացքում որոշ մարդիկ միջադեպը մեկնաբանեցին հայաստանցիների եւ արցախցիների միջեւ անջրպետ ստեղծելու տեսանկյունից, եղան նաեւ այլ մեկնաբանություններ, բայց ընդհանուր առմամբ, հասարակությունը դատապարտեց արտաքին տեսքի եւ ազատ պահվածքի համար կնոջը ոստիկանություն հրավիրելու քայլը:

Այս առիթով «Հայ Ձայնը» զրուցեց Արցախի Մարդու Իրավունքների պաշտպանի աշխատակազմի դեպարտամենտի նորանշանակ ղեկավար Արտակ Բեգլարյանի հետ.

 

-Ինչպե՞ս եք մեկնաբանում միջադեպը, մանավանդ այն հանգամանքը, որ որոշ մարդկանց կողմից այն նպատակաուղղվեց անջրպետ ստեղծելու հայաստանցիների եւ արցախցիների միջեւ:

-Ցանկացած դեպքում անընդունելի է, որ մարդիկ այդ տարանջատումը դնում են, այս դեպքում՝ արցախցի-հայաստանցի, բայց մյուս դեպքում կարող է լինել գյումրեցի, սյունեցի եւ այլն: Ես դեմ եմ նման տարանջատումներին: Իսկ թե նպատակաուղղվա՞ծ էր նման մոտեցումը, թե՞ չէ, մի քիչ կասկածում եմ: Երեւի մարդիկ կան, որ պղտոր ջրի մեջ փորձում են ձուկ որսալ, անուններ չեմ կարող տալ, թե ովքեր են այդ մարդիկ, բայց տպավորություն կա, որ ոմանք շահագրգռված են այս աղմուկից: Հատկապես՝ ադրբեջանցիները, մնացածի հարցում համոզված չեմ:

-Ի՞նչ կարող եք ասել հարցը շահարկողներին:

-Կարող եմ ասել, որ անընդունելի է հարցը քաղաքական դաշտ տեղափոխելը, սա զուտ մարդու իրավունքներին վերաբերող հարց է, եւ ոստիկանությունն էլ, Արցախի իշխանությունն էլ, համապատասխան քայլեր պետք է կատարեն եւ կատարում են այդ ուղղությամբ: Իսկ ովքեր քաղաքականացնում են, ենթադրում եմ՝ այդ ճանապարհով ինչ-որ խնդիրներ են լուծում: Անձամբ ես որեւէ խտրականություն չեմ դնում, եւ, ինքս էլ, ապրելով Երեւանում երկար ժամանակ, իմ հանդեպ ոչ մի խտրականություն չեմ նկատել, առավելեւս նման դեպքեր հայաստանցիների հանդեպ Արցախում չեմ նկատել:

Իհարկե, ինչպես ամբողջ աշխարհում, մեզ մոտ էլ կան կարծրատիպեր, որոնք միայն արցախցի-հայաստանցի սահմանումներին չեն վերաբերում, այլ նույնիսկ երկու գյուղերի միջեւ կարող է այդ կարծրատիպը գոյություն լինել, մի գյուղի բնակիչները կարող են մյուս գյուղի բնակիչներին ինչ-որ անուններ դնել, բայց դա բնականաբար, չի վերածվում ինչ-որ բախման, հակամարտության, վեճերի, այլ զուտ կարծրատիպային մակարդակում է մնում, որը ինչ-որ տեղ բնական է սոցիալական հանրույթների համար:

-Արցախի մարդու իրավունքների պաշտպանի գրասենյակը նման դեպքերին սովորաբար ինչպե՞ս է արձագանքում: Ո՞րն է մոտեցումը առհասարակ, եղե՞լ են նման այլ դեպքեր, մանավանդ որ շատ արտասահմանցիներ են այցելում Արցախ:

-Իրականում մենք՝ այսինքն Արցախի մարդու իրավունքների պաշտպանի գրասենյակը, մինչեւ հիմա նման բողոքներ չենք ստացել, համենայնդեպս պաշտոնապես չենք ստացել: Նման գրանցված բողոքներ չկան օտարերկրացիներից, հյուրերից կամ թեկուզ տեղում՝ ոստիկանության աշխատանքի, նրանց վերաբերմունքի մասին:

-Արցախի օրինապահ մարմինները այս հարցի առումով ի՞նչ եզրահանգում են արել:

-Եթե նկատել եք՝ մենք մանրամասն հարցում ենք ուղարկել ոստիկանություն՝ ակնկալելով պարզաբանում: Մեր հարցման մեջ էլ նշել ենք, որ պարզաբանումը սպասում ենք ստանալ հնարավորինս սեղմ ժամկետներում՝ հաշվի առնելով նաեւ հարցի հանրային նշանակությունը:

Նախքան այդ, Արցախի նախագահի հանձնարարությամբ արդեն համապատասխան ծառայողական քննություն է սկսվել: Երեկ էլ, ոստիկանությունն արդեն առաջին պաշտոնական հաղորդագրությունը տարածեց այն մասին, որ իրենց մոտ ծառայողական քննություն է սկսվել, եւ կարծես թե որոշակի արդյունքներ կան, բայց բնականաբար, դեռ վաղ է վերջնական հետեւություններ անելու համար:

-Տեղյա՞կ եք՝ Արցախի բնակչության մոտեցումն այս հարցին ինչպիսի՞ն է, միանշանա՞կ է:

-Իհարկե, միանշանակ չէ, բայց ես երեւի լիազորված չեմ Արցախի հանրության անունից կարծիք հայտնելու: Տարբեր մարդիկ տարբեր կարծիք ունեն, բայց բնականաբար, հիմնական մասը կարծում է, որ անօրինական գործողություններ չպետք է լինեն, հարգանք պետք է լինի միմյանց հանդեպ, եւ դա վերաբերում է բոլորին, թե՛ ոստիկաններին, թե՛ քաղաքացիներին: Թե՛ ոստիկանները հարգալից պետք է լինեն եւ թե՛ քաղաքացիները միմյանց հանդեպ: Սա ե՛ւ մեր բարոյական արժեքներից եւ նաեւ բխող օրենքից բխող սկզբունք է:

-Այս խնդիրը նաեւ սփյուռք է հասել եւ արձագանքներ կան նաեւ այնտեղ: Ի՞նչ կարող եք ասել սփյուռքահայերին, որոնց համար Արցախը սրբավայրին հավասարազոր տեղ է:

-Սփյուռքահայերին կարող եմ ասել, որ սպասեն ծառայողական քննության արդյունքներին, նոր միայն հետեւություններ անեն, քանի որ տեղեկատվությունը ի սկզբանե միակողմանի է եղել, հիմա պետք է ոստիկանությունը համապատասխան պարզաբանումները տա, որպեսզի համակողմանի տեղեկատվություն ունենանք եւ կարողանանք եզրակացություններ անել:

Կարեւոր է, որ քաղաքացին հնարավորինս մանրամասներ է ներկայացրել, որը մեր գրասենյակի համար ողջունելի է, եւ հնարավորություն կտա մանրամասն հասկանալ, թե ինչ է կատարվել:

Բայց մի բան միանշանակ է. այն շեշտադրումը, որ կա, Ասյայի՝ հայաստանցի լինելու հետ կապված, արհեստական է, չկա նման բան, մինչեւ հիմա էլ չի եղել, սփյուռքահայերն իրենք էլ կվկայեն, որ Արցախում իրենք խտրականության չեն ենթարկվել, ընդհակառակը, շատ անգամ նրանց հանդեպ ավելի հյուրընկալ ենք լինում, քան՝ տեղացիների հանդեպ:

 

Հատուկ ՀԱՅ ՁԱՅՆի համար

Լրահոս
Ամենաընթերցվածը

Նմանատիպ նորություններ