Կա մի բան, որ աշխարհի զանազան ծայրերից կարող է միավորել հայերին հոգով, մտքով և արյունով, այն է՝ ԱԶԳԱՅԻՆ ՍԵՐԸ:

Րաֆֆի

Հայաստանի Սփիւռքի Նախարար Մխիթար Հայրապետեանի Հանդիպումը Նիւ Եորքահայութեան Հետ

am
Hayastani Sp`iwrhk`i Nakharar  Mkhit`ar Hayrapeteani  Handipowme Niw Eork`ahayowt`ean Het_84791

Հինգշաբթի, Օգոստոս 2ի երեկոյեան ժամը 8ին, ընդառաջելով Հայաստանի Սփիւռքի նախարարութեան եւ Հայաստանի Դեսպանութեան հրաւէրին տեղի ունեցաւ սրտբաց հանդիպում (community town hall) մը Հայաստանի նորանշանակ Սփիւռքի նախարար Պրն. Մխիթար Հայրապետեանի հետ, Թէքէեան Մշակութային Միութեան Նիւ Ճըրզիի Կեդրոնին (Էնկլվուտ Գլիֆֆս) մէջ, ուր ներկայ էին բարերարներ, հասարակական գործիչներ, արուեստագէտներ, տարիներու վրայ երկարող ազգային ծառայութեամբ ծանօթ դէմքեր եւ նախկին հայաստանցիներ:

 

Պարոն նախարարին կ'ընկերանար Ուաշինկթընի մօտ ՀՀ դեսպան Պրն.Գրիգոր Յովհաննիսեանը որ յատկապէս մայրաքաղաքէն գալով ներկայ գտնուեցաւ այս միջոցառման, ինչպէս նաեւ՝ նախարարութենէն Վաղարշակ Յակոբեան եւ դեսպանատունէն՝ Մակար Մելիքեան: Պարոն նախարարը իր Նիւ Եորք այցելութեան օրը ունեցաւ հանդիպումներ զանազան հաստատութիւններու պատասխանատուներուն հետ:

 

Ջերմ ընդունելութենէ ետք, ԹՄՄ Մեծագոյն Նիւ Եորքի ատենապետուհին Տիկին Հիլտա Յարութիւնեան բարի գալուստ մաղթեց Պարոն Հայրապետեանին Թէքէեանի յարկէն ներս գտնուելուն համար եւ յանուն Միութեան իրեն յանձնեց նիւ եորքահայ արուեստագէտ Մայքըլ Արամի խորհրդանշական «Նոյի Տապանը եւ Արարատը» արձանիկը ի յիշատակ իր այցելութեան եւ հրաւիրեց ԹՄՄ Կեդրոնական Վարչութեան ատենադպիրը՝ Յակոբ Վարդիվառեանը ներկայացնելու օրուան հիւրը եւ վարելու հանդիպումը:

 

Պարոն Յ. Վարդիվառեան իր կարգին հրաւիրեց Դեսպան Յովհաննիսեանը ողջունելու ներկաները: Պարոն Յովհաննիսեան ջերմօրէն արատայայտուեցաւ թէքէեանցիներու մասին եւ յաջողութիւն մաղթեց նախարարին իր նոր պաշտօնին ստանձման առթիւ: Օրուան հանդիսավարը սեղմ գիծերու մէջ ներկայացուց պետական հիւրը անդրադառնալով անոր մասնագիտութեան՝ արեւելագիտութեան եւ ի մասնաւորի թրքագիտութեան:

 

Այնուհետեւ հրաւիրուեցաւ օրուան հիւրը, որ հակիրճ կերպով ներկայացուց թաւշեայ յեղափոխութեան տուն տուող պատճառները, որոնք հետեւանք էին անցնող երկու տասնամեակներու վրայ երկարող մարդկային անարդարութիւններու, երկրի հարստութեանց կողոպուտի, հայրենաթափութեան, տնտեսական տագնապի: Նիկոլ Փաշինեանի շարժումը ան նկատեց ժողովրդական շարժում եւ որ իր արձագանքները ունեցաւ նաեւ Սփիւռքի տարածքին: Ան ըսաւ թէ նիւթական ինչ սահմանափակ միջոցներով սկսաւ յեղափոխութիւնը: Տուաւ լաւատեսութեան հեռանկարները գալիք տարիներու համար: Կարեւորութեամբ շեշտեց հայրենակերտումի սփիւռքի

 

մասնակցութեան անհրաժեշտութեան երաշխաւորելով, հայրենակիցներու ներդրումները:

 

Առիթ տրուեցաւ ներկաներուն տալու հարցեր, որոնց ան տրամաբանօրէն, հանգիստ եւ լայնախոհութեամբ պատասխանեց: Բացի Հայաստան-Սփիւռք կապերուն վերաբերող հարցումներէն, Հայաստանէն այս ափերը արտագաղթած հայրենակիցներու ներկայացուցած ցաւերուն եւ ներհայաստանեան խնդիրներուն եւս ան ջանաց տրամաբանական պատասխաններ տալ:

 

Փակման խօսքով Պրն. Վարդիվառեան անհրաժեշտութիւն նկատեց Հայաստանի օգնելու հրամայականը եւ վստահեցուց Պրն. Հայրապետեանը որ ԹՄՄ եւ զինք հովանաւորող կազմակերպութիւնը՝ ՌԱԿը ինչպէս Առաջին Հանրապետութեան օրերուն ու անկէ ետք՝ այսօր ալ յանձնառու կը մնայ իր սկզբունքներուն շարունակելու Հայաստան-Սփիւռք կապերու ամրապնդումը:

 

Պաշտօնական յայտագրի աւարտին ներկաները շրջապատեցին Պարոն նախարարը մօտէն ծանօթանալու իրեն եւ կամ տալու անձնական հարցեր:

 

Տեղի ունեցաւ պատշաճ հիւրասիրութիւն:

 

 

 

 

 

 

 

Լրահոս
Ամենաընթերցված

Նմանատիպ նորություններ