• USD 486.78
  • GBP 644.89
  • EUR 574.01
  • RUB 8.17
  • GEL 178.88
Նոյեմբեր 19, 2017
Լրահոս, Մեր ձայնը, Special reports, 24 ապրիլի
25.04.2017 | 00:08

Ապրիլի 24-ը ՌԱԿ Լոռիի մարզային շրջանակը իւրովի նշանաւորեց (Լուսանկարներ)

Ապրիլի 24-ը բնականաբար եւ առաջին հերթին մեր ցեղասպանուած ու այլեւս սրբադասուած հայրենակիցներու յիշատակի եւ ոգեկոչման օրն է, եւ ՌԱԿ Լոռիի մարզային շրջանակը չէր կրնար իր յարգանքի տուրքը չմատուցել մեր աւելի քան մէկուկէս միլիոն զոհերու յիշատակին: Ներկաները Գուգարաց թեմի առաջնորդ Սեպուհ արքեպիսկոպոս Չուլճեանին գլխաւորութեամբ ծաղիկներ խոնարհեցին ՌԱԿ Լոռիի մարզային շրջանակի ատենապետ Սէյրան Ղարիբեանին ձեռամբ պատրաստուած ու գրասենեակին կողքը տեղադրուած յուշակոթողին առջեւ, որ նուիրուած էր Հայոց Մեծ Եղեռնի 100-ամեայ տարելիցին: Սրբազանը միջոցառումն սկսաւ Տէրունական աղօթքով, որմէ ետք գրասենեակին մէջ բացման խօսքով հանդէս եկաւ Լոռիի մարզային շրջանակի ատենապետը` այսօրուայ եւ առաւել եւս` վաղուայ սերունդներուն համար կարեւորելով օրուայ խորհուրդը:
Սէյրան Ղարիբեան այնուհետեւ խօսքը փոխանցեց «Վանաձոր» ակումբի ատենապետուհի Նարինէ Կռոյեանին: Վերջինս հակիրճ կերպով ներկայացուց աշխարհաքաղաքական արդի մարտահրաւէրներու առանձնայատկութիւնները` շեշտելով Թուրքիոյ մէջ սահմանադրական փոփոխութիւններու եւ նախագահական հանրապետութիւն դառնալու հետ կապուած` թրքական քաղաքականութեան ալ աւելի անկանխատեսելի դառնալու հանգամանքը: Ան նշեց, որ այս համապատկերին մէջ, հաշուի առնելով Թուրքիա-Ատրպէյճան դաշնակցային սերտ յարաբերութիւնները Հայաստան պէտք է պատրաստ ըլլայ ընդդիմանալու հնարաւոր նոր յարձակումներու թէ' քաղաքականութեան, եւ թէ պատերազմի դաշտին մէջ: Նշանաբանը մէկն էր` մենք այլեւս իրաւունք չունինք ցեղասպանուելու եւ պարտաւոր ենք ապրիլ` Հայաստանը դարձնելով ուժեղ ու հաւակնոտ, դրացիներուն հետ հաւասարութեան սկզբունքով խօսող երկիր:
Այնուհետեւ Նարինէ Կռոյեան կարդաց մերօրեայ արցախեան պատերազմին նուիրուած իր «Արյիւն» պատմուածքը: Լսարանը լսեց եւ յուզմունքով քննարկեց պատմուածքին մէջ տեղ գտած իրողութիւնները:
Գուգարաց թեմի առաջնորդ Սեպուհ արքեպիսկոպոս Չուլճեան անդրադարձաւ այդ եւ այլ իրողութիւններու նոյնպէս` իւրովի բացայայտելով այն պատճառները, որոնք այսօր կը բնութագրեն Հայաստանի ներքին ոչ մխիթարական տնտեսական, հասարակական եւ ժողովրդագրական վիճակները, որոնք կը տկարացնեն մեր պետականութեան հիմքերը: Ան համոզուած էր, որ պատմութեան դասերն ու ապտակները մեզի համար երբեք դաս չեն եղած, եւ մենք ենք մեղաւորն այսօր տկարացած Հայաստան ունենալու համար.

«Հայը հային չի սիրում: Մեզանում պակասել է սէրը: Մենք միայն չարախօսում ենք, ինչպէս դա անում էինք Մուշի, Ատանայի կոտորածներից առաջ, ինչպէս հային արհամարհելով, վստահում էինք քրտին եւ թուրքին, ինչպէս հայը հարստահարում էր հային…. Կարծու՞մ էք այսօր որեւէ բան է փոխուել…»: Ան համոզուած էր, որ երկիրն աւելի լաւը դարձնելու համար նախ մենք պէտք է փոխուինք, համախմբուինք, աւելի լաւը դառնանք, սատար կանգնինք մէկս միւսին, վատը տեսնելով` չմոռնանք մատնանշել նաեւ լաւը: Սրբազանն իր խօսքն աւարտեց թրքական ասացուածքով. «Մենք այնքան կը խօսինք սատանային մասին, որ կը մոռնանք աղօթել»:

Սրբազանին անաչառ վերլուծութիւններուն հետեւեցաւ հարց ու պատասխանը, տեղի ունեցաւ բարձրացուած հարցերու աշխոյժ քննարկում: Ներկաները համաձայն էին քննադատութեան հետ եւ վիճայարոյց խնդիրներ առաջ կը քաշէին, աշխոյժ կերպով կը քննարկէին բարձրաձայնած կարծիքներն ու տեսակէտները` միաժամանակ առաջարկելով ամենատարբեր լուծումներ: Բոլորն այնքան յուզուած եւ ոգեւորուած էին, որ ժամանակն աննկատ անցաւ: Ոչ ոք կարծէք կը պատրաստուէր հեռանալ: Սակայն յայտնի է, որ ամէն բան ունենալով սկիզբ` ունի նաեւ վերջ: Եւ միջոցառան աւարտին ՌԱԿ Լոռիի մարզային շրջանակի ատենապետ Սէյրան Ղարիբեան ամփոփելով հաւաքոյթը` մէկ անգամ եւս կարեւորեց Ապրիլքսանչորսի խորհուրդը: Ան շնորհակալութիւն յայտնեց ներկաներուն եւ յատկապէս Գուգարաց թեմի առաջնորդ Սեպուհ արքեպիսկոպոս Չուլճեանին մշտապէս եւ սիրայօժար կերպով ՌԱԿ շրջանակին կողքը գտնուելուն համար:

Ն. Կռոյեան



    Լրահոս
    Օրացույց
    Ամենաընթերցված
    30/09/2017 03:07event_type_4
    asas