• USD 486.78
  • GBP 644.89
  • EUR 574.01
  • RUB 8.17
  • GEL 178.88
Նոյեմբեր 20, 2017
Հայաշխարհի ձայն, Լրահոս, Ամերիկա
26.10.2017 | 12:18

Աստղագիտութեան վերջին նորութիւններու գեղեցիկ ներկայացում մը երիտասարդ գիտնական դոկտ. Զաւէն Արզումանեանի կողմէ

Ուրբաթ՝ Հոկտեմբեր 20-ի երեկոյեան Մոնթրէալի Թէքէեան Մշակութային Միութեան սրահը ամբողջութեամբ լեցուն էր հայ եւ օտար ունկնդիրներով, որոնք եկած էին հաղորդակից դառնալու տիեզերքի առեղծուածներու վերջին զարգացումներուն: Կազմակերպիչներու մտահոգութիւնը՝ թէ այսպիսի չափազանց մասնագիտացած նիւթեր չեն քաջալերեր հանրութեան հետաքրքրութիւնը, շուտով փարատեցաւ, շնորհիւ դասախօսին տաղանդին, որ հասկնալի օրինակներով եւ լուսանկարներով մատչելի կը դարձնէր բնագիտական բարդութիւնները: Նոյնպէս, վերջին քանի մը ամիսներուն, միջազգային մամուլը լայնօրէն անդրադարձած էր ՆԱՍԱ-ի ծիրէն ներս Դոկտ. Զաւէն Արզումանեանի եւ իր գործընկեր Քիթհ Ժանտրոյի գլխաւորած գործունէութեան եւ հետաքրքրութիւն ստեղծած էր հանրութեան մէջ: Այս մասին տեղեկանում ենք abakanews.org-ից:

 

ԹՄՄ-եան ժրաջան ատենապետ՝ Պերճ Գօգօրեան իւրայատուկ սրամտութեամբ ներկայացուց բանախօս Դոկտ. Զաւէն Արզումանեանը, որ ծնած է Մոնթրէալ 1967-ին, առաջին շրջանաւարտներէն եղած է ՀԲԸՄ Ալեք Մանուկեան Վարժարանէն եւ տեղւոյս ՄքԿիլլ Համալսարանէն  «Պսակաւոր» աստիճանը ստանալէ ետք յաճախած է ՄՆ.ու Նիւ Ճըրզիի Փրինսթըն համալսարանը ուր ստացած է «Մագիստրոս» եւ ապա Տոքթորայի  աստիճանները: Յաջորդող չորս տարիներուն ան Նիւ Եորքի Քորնել համալսարանին մէջ զանազան գիտահետազօտութիւններ կատարած է Փրոֆ. Երուանդ Թերզեանի գլխաւորած աստղագիտութեան բաժնին մէջ: Յաջորդաբար, ՆԱՍԱ-ի հովանաւորութեամբ զանազան հետազօտական ծրագիրներէ ետք ընդունուած է իր գլխաւոր ծրագիրը՝ «մարած աստղեր»ու հիմնական ուսումնասիրութիւնը:

 

Իր ներկայացումէն առաջ, Դոկտ. Զաւէն Արզումանեան մաքուր հայերէնով իր շնորհակալութիւնը յայտնեց տրուած պատիւին համար, ու երախտագիտութիւն յայտնեց Արմէն Քէպէքի եւ ԹՄՄ-ի ղեկավարներուն: Ապա ան ըսաւ թէ գիտական նոր զարգացումներու հայերէն բառերը տակաւին չեն ստեղծուած, ուրեմն ստիպուած անգլերէնով   պիտի կատարէ իր ներկայացումը: Ան նախ անդրադարձաւ Space Station (Տիեզերքի Կայան)-ին, որ մօտ տասը տարի առաջ արձակուեցաւ անջրպետին մէջ ու կը ծառայէ որպէս  տիեզերքի շրջող «օդակայան»ը, ուր կայ տիեզերագնացներու հերթական ներկայութիւն մը: Քանի մը ամիս առաջ, հրթիռով մը արձակուեցաւ Արզումանեանի եւ գործակիցներուն կողմէ կազմուած յատուկ սարքաւորում մը (կոչուած NICER), որ «Գանատայի Թեւ»ի միջոցաւ հաստատուեցաւ այդ կայանին վրան որպէսզի արձանագրէ եւ երկիր ուղարկէ հեռաւոր աստղերու ճառագայթները: Մարած աստղերու կողմէ արձակուած Ք-ճառագայթները շատ տկար ըլլալով անոնք կարող չեն թափանցելու Երկրի մթնոլորտը. ուրեմն միայն NICER-ի միջոցաւ է որ կարելի պիտի ըլլայ հաւաքել այս հեռաւոր մարած աստղերու կողմէ արձակուած ճառագայթները: Այս սարքաւորումը սկսած է աշխատիլ եւ աստղագէտներ սկսած են ուսումնասիրել այդ հեռաւոր աստղերը: Մինչ այդ՝ հեռաւոր այս աստղերու քարտէսը կը սկսի կազմուիլ որ ապագայի տիեզերագնացներու ուղեցոյցը պիտի հանդիսանայ, բազմաթիւ այլ օգտակարութիւններու կողքին:

 

Իր շնորհաւորական եւ շնորհակալութեան խօսքերէն ետք հանդիսավար Պերճ Գոգորեան յայտարարեց յարգելի բանախօսին մանկութենէն ծանօթ ու սիրած ընտանիքի մտերիմ՝ Տիկին Այտա Պաղչէճեան, որ հիւանդ ըլլալով անկողնէն կը ծառայէր, կը նուիրէ 1000 տոլար «Ապագայ»ի Ֆոնտին:

 

Ներկաները բուռն ծափողջոյններով գնահատեցին ներկայացումը: Բազմաթիւ օտար ներկաներ հաւաքուեցան բանախօսին շուրջ ու երկարատեւ հարցումներով պատասխաններ ստացան իրենց հարցերուն:



    Լրահոս
    Օրացույց
    Ամենաընթերցված
    30/09/2017 03:07event_type_4
    asas