• USD 486.78
  • GBP 644.89
  • EUR 574.01
  • RUB 8.17
  • GEL 178.88
Նոյեմբեր 20, 2017
Հայաշխարհի ձայն, Լրահոս, Հարցազրույց, Հայաստան
10.11.2017 | 13:33

Պատրիարքական ընտրութեան հարցով համայնքին մէջ խուճապ չկայ եւ մենք լաւատես ենք. Տ. Զագէոս ծ.վրդ. Օհանեան

Պոլսոյ պատրիարքական տագնապը կը շարունակուի: Մինչ կը նախատեսուէր, որ յառաջիկայ դեկտեմբերին համայնքը պիտի կարողանար նոր պատրիարքի ընտրութիւնը իրականացնել, անդին յստակ կը դառնար, որ Թուրքիոյ պետական շրջանակներ կարգ մը պահանջներ ունին Պատրիարքութեան յարկին ներքեւ գործող եւ ընտրութիւնները կազմակերպելու կոչուած՝ «Նախաձեռնարկ մարմնէն»: Տակաւին կան խօսակցութիւններ, ըստ որոնց Անգարա Տեղապահ Պեքճեան սրբազանի նկատճմամբ որոշ վերապահութիւններ ունի: Այս եւ Պոլսոյ պատրիարքութեան տագնապին մասին յաւելեալ տեղեկութիւններ ստանալու նպատկով «Հայ Ձայն» հեռախօսային զրոյց մը ունեցաւ Պոլսոյ միաբանութեան եւ կրօնական ժողովի անդամ Տ. Զագէոս ծ. Վրդ. Օհանեանին հետ

Հայր սուրբ ի՞նչ տեղեկութիւններ ունիք պատրիարքական ընտրութիւններուն վերաբերեալ

Պէտք է ըսել, որ տեղապահ Գարեգին Պէքճեան սրբազանը Պոլսոյ միաբան հոգեւորականները եւ ազգային գործիչները համախմբելով այդ գործընթացի համար անհրաժեշտ աշխատանքները կատարեցին՝ այն ինչ որ տասը տարիներու ընթացքին չէինք կրցած կատարել: Իսկ ներկայիս պետութենէն գալիք պատասխանը կը սպասենք: Սակայն տարաձայնութիւններ կան՝ ոչ պաշտօնական, նույնիսկ մեր համայնքէն կարգ մը անձեր լուրեր կը տարածեն, թէ ընտրութիւն պիտի չըլլայ կամ պետութիւնը չի ճանչնար, սրբազանին տեղապահութիւնը: Այս բոլորը առ այսօր համայնքին մէջ դիտմամբ տարածուած լուրեր են: Մենք տակաւին ոչ տեղապահի հասցէին եւ ոչ ալ պատրիարքական ընտրութեան հետ կապուած որեւէ մէկ պաշտօնական պատասխան մը չենք ստացած Թուրքիոյ կառավարութենէն: Այսինքն պատրիարքարանին կեցուածքը շատ յստակ է եւ մենք մինչեւ որ կառավարութենէն դրական կամ ժխտական որեւէ մէկ գրաւոր պատասխան մը չստանանք պիտի շարունակենք մեր տեղապահով:

 

Շշուկներ կան, որ պետութիւնը այս «Նախաձեռնարկ մարմին»ը չընդունիր եւ այլն: Այդ մասին ի՞նչ կ'ըսէք:

Խօսքը թերեւս «Նախաձեռնարկ մարմին»ին մաս կազմող որոշ անդամներու մասին է: Բայց ըսել, որ պետական մարմիններ ամբողջութեամբ դէմ են «Նախաձեռնարկ մարմին»ին առնուազն սխալ է: Այս առումով ալ գրաւոր որեւէ փաստաթուղթ մը պատրիարքարան չէ հասած:

Այսինքն այս բոլորը պարզապէս տարաձայնութիւննե՞ր են:

Այո տարաձայնութիւններ են: Մենք մեր գործը կը շարունակենք: Համայնքային եւ եկեղեցական կեանքը իր բնական հունին մէջ կը շարունակուի, այսինքն՝ եկեղեցւոյ, կիրակնօրեայ պատարագները, տօնական մատաղները, կիրակնօրեայ վարժարանները, հայկական մամուլն ու դպրոցները եւ համայնքային կեանքը իր ամբողջ տարողութեամբ եւ տեղապահ Սրբազան հօր հովանիին ներքոյ կը շարունակուի: Ամէն ինչ շատ բնական է, այսինքն համայնքային խուճապ մը խնդրոյ առարկայ չէ: Եւ կ'ուզեմ ըսել, սա իմ անձնական կարծիքս չէ, ուրիշ անձերէ կամ պաշտօնական անձերէ ալ կրնաք հաստատել, թէ համայնքը իր տեղապահով երջանիկ է:Ան ուր որ կ'այցելէ համայնքը զինք շատ ջերմեռանդութեամբ կը դիմաւորէ: Այս անցեալ ամիսներուն ընթացքին տեղապահը հոգեւորականաց հետ, դպրոցական աշակերտութեանց հետ, եկեղեցւոյ այլ աստիճանի, այսինքն՝ սարկաւագ, դպիր, սպասաւորներուն հետ, ուսուցիչներու, դպրոցի տնօրէններու, ազգային գործիչներու, բարերարներու, բժիշկներու հետ, այսինքն՝ համայնքը կազմող բոլոր խաւի ներկայացուցիչներուն հետ առանձին առանձին պատրիարքարանի մէջ հանդիպումներ ունեցաւ: Համայնքին դժուարութիւններուն մասին խօսուեցաւ, մեր ազգի զաւակներուն դժուարութիւններուն մասին ու վերջապէս այն մասին, որ ինչ կը սպասեն մեր պատրիարքարանէն: Այս աշխատանքները եւ հանդիպումները, որոնք երկար տարիներէ ի վեր տեղի չէին ունեցած Մեսրոպ Պատրիարքէն ետք՝ շատ դրական արձագանգ գտան համայնքին մէջ:

Այս սպասողական իրավիճակը մինչեւ ե՞րբ կրնայ տեւել, որուհետեւ գիտէք շատեր կը խօսէին, որ նոյեմբերին կամ դեկտեմբերին պատրիարքի ընտրութիւն պիտի ունենանք:

Պատրիարքարանը երբեք որոշ թուական մը չէ տուած:Մենք պարզապէս պատրիարքական ընտրութիւնը՝ 85-րդ հայոց պատրիարքը ընտրելու այդ գործընթացը առաջ տանելու համար պէտք եղած բոլոր աշխատանքները կատարած ենք, այսինքն՝ պատրիարքարանի կողմէ այդ ուղղութեամբ կատարուելիք որեւէ աշխատանք մը չէ մնացած եւ «Նախաձեռնարկ մարմին»ը, շաբաթը քանի մը անգամ, կրկին պատրիարքարանի յարկին տակ տեղապահ սրբազան հօր եւ մեր կրօնական ժողովոյ ատենապետ Սահակ եպիսկոպոսի գլխաւորութեամբ՝ իր համագումարները, իր ժողովները կը գումարէ: Յստակ թուական մը նորէն կարելի չէ տալ, որովհետեւ ամէն ինչ կախուած է կառավարութենէն գալիք գրաւոր պատասխանէն եւ անոր մասին արդէն տեղապահ սրբազանը նամակ մը գրեց եւ մամուլի հետ բաժնեց, ելեկտրոնային ցանցի վրայ ալ տարածուեցաւ եւ համայնքի կողմէ ալ բաւական գնահատուեցաւ, ուր յստակօրէն ըսուած է ՝ «մինչեւ այն ատեն, որ, Դուք՝ պետութիւնդ, չէք մերժած իմ տեղապահութիւնս եւ մինչեւ այն ատեն, որ գրաւոր ձեւով այդ մասին չէք յայտնած ինծի՝ ես տեղապահն եմ, իմ երդումս կայ, իմ ուխտս կայ եւ այս Աթոռին, այս եկեղեցիին եւ այս համայնքին պատասխանատուն եմ»: Մենք ընտրութեան հարցով լաւատես ենք, որովհետեւ ցայսօր որեւէ մէկ ձեւով թրքական կառավարութիւնը չէ խոչընդոտած՝ ոչ համայնքային տեղական ընտրութիւնները եւ ոչ ալ՝ առհասարակ պատրիարքական ընտրութիւնները: Փաստը պատմութիւնն է: Մենք մինչեւ այսօր 84 պատրիարք ընտրած ենք խաղաղ պայմաններու մէջ: Համաշխարհային առաջին եւ երկրորդ պատերազմներու ժամանակ նույնիսկ երբեք չէ խափանուած: Մենք՝ հոգեւորականներս եւ համայնքը այս բոլորը «ըսի-ըսաւ»ի մակարդակով կ'ընկալենք եւ չենք կարծեր, որ Թուրքիոյ կառավարութիւնն ալ որեւէ փակուղիի մատնէ այս գործընթացը: Տեղապահն ալ իր վերջին նամակին մէջ յստակօրէն շեշտեց իր վստահութիւնը մեր պետութեան հանդէպ եւ այդ գրութեան մէջ յստակօրէն ընդգծեց, թէ հայ քաղաքացիները հայոց պատրիարքութեան ընդմէջէն փափաքը ունին 85-րդ նոր Պատրիարք ընտրելու: Այս փափաքին պետութիւնը պիտի ընդառաջէ վստահաբար:

Իսկ այս տարաձայնութիւնները որո՞նց կողմէ կը ստեղծուին ու կը տարածուին:

Ես այս պահուն անուններու վրայ կեդրոնանալ չեմ ուզեր: Այսինքն այս անունները յստակ են, պարզապէս անոնք համայնքի զաւակներն են եւ կարեւոր պարտականութիւններ ստանձնած են, մինչեւ իսկ կարեւորագոյն բարերարներ են, ազգային գործիչներ, որոնք մայրաքաղաքի մէջ որոշ մակարդակի վրայ յարաբերութիւններ եւ շփումներ ունին: Այս անձերու կողմէ տարածուած եւ տակաւին տարածուող խօսակցութիւններ են, բայց մենք՝ Հայոց Պատրիարքարանը, հաստատութիւն է, հետեւաբար մեր համայնքի քանի մը զաւակներուն ըսածովը չէ, որ պիտի շարժինք: Հայոց Պատրիարքարանի եւ պետութեան միջեւ եղած թղթակցութիւնը կարեւոր է եւ մենք ինչպէս որ պաշտօնապէս ամէն ինչ պետութեան տեղեկացուցինք, բնականաբար, մեր արդար ակնկալիքն է, որ մենք ալ նոյն վերաբերմունքին արժանանանք:


    Լրահոս
    Օրացույց
    Ամենաընթերցված
    30/09/2017 03:07event_type_4
    asas