• USD 480.62
  • GBP 625.72
  • EUR 560.16
  • RUB 7.58
  • GEL 196.33
Հուլիս 23, 2018
Շարական

«Բարեխօսութեամբ Վերին քո զօրացդ

Միշտ անշարժ պահեայ զԱթոռն Հայկազեան»:

 

 

Հայաշխարհի ձայն, Լրահոս, Միջին Արևելք
20.12.2017 | 19:27

Կէտիկ Փաշա, «Սրբոց Նահատակաց» եկեղեցի եւ այլ բաներ ...

Շատ գրուած է Թուրքիա ապրող հայաստանցիներուն մասին: Խօսքը բնականաբար Պոլսոյ մէջ կայք հաստատած հայաստանցիներուն մասին է, որոնք այսօր պոլսահայ համայնքի կտրուածքով պատկառելի թիւ մը կը կազմեն: Երբ այս խնդրին վերաբերեալ կը փորձենք ճիշդ տուեալներ որոնել կը հանդիպինք լուրջ «արգելքներ»ու, որովհետեւ տարիներէ ի վեր Պոլիս ապրող հայաստանցիներէն շատ շատերը հոն կը մնան առանց օրինական թուղթերու, հետեւաբար ուր եւ որու դիմել անոնց մասին ճշգրիտ եւ վերջնական տուեալներ ստանալու համար:

Այս բոլորէն անդին այսօր երեւելի սկսած է դառնալ, որ Պոլիս ապրող հայաստանացիներու կարեւոր մէկ տոկոսը սկսած է բոլորուիլ «Հրանդ Տինք»ի անուան վարժարանին մէջ:

Դպրոցը, որ հիմնադրուած է 14 տարի առաջ (հիմնադրման օրերուն դպրոցը անուանում մը չունէր) կայք հաստատած է Կէտիկ Փաշա կոչուող (անցեալին հայահոծ) թաղամասի Հայ Աւետարանական Սրբոց Նահատակաց եկեղեցիի մայր շէնքին ներքեւը գտնուող յարկին մէջ:

Ճիշդ է, որ վարժարանը արդիական պայմաններ չունի, բայց զգալի է, որ հոն կարեւոր եւ դրական աշխատանք մը կը տարուի: Ու գաղտնիք ալ չէ, որ հայկական համայնքին մէջ այն միակ կրթարանն է, ուր անկաշկանդ ձեւով աշակերտներուն հայոց պատմութիւն կ'ուսուցանուի:

Մեր վերջին Պոլիս ունեցած ուղեւորութեան ընթացքին յաջողեցանք մօտէն ծանօթանալ այդ վարժարանի ընդհանուր պայմաններուն ու հետաքրքրական էր նաեւ, որ այսօր շնորհիւ այդ դպրոցին շուրջ եղող կարգ մը պոլսահայ նուիրեալներուն դպրոցը սկսած է վերածուիլ համայնքային կառոյցի:

Անշուշտ այս գործընթացը երկար եւ հետեւողական ճիգեր կը պահանջէ, սակայն տարբեր մակարդակներու վրայ ընթացք առած է խօսակցութիւն մը, որուն հիմքով «Հրանդ Տինք» անուան վարժարանը պիտի տեղափոխուի աւելի լաւ պայմաններ ունեցող շէնք մը: Ասոր կողքին ասկէ ամիս մը առաջ տեղի ունեցած եւ դպրոցին պէտքերը հոգալու համար սարքուած «սիրոյ սեղան»ը ցոյց կու տայ, որ պոլսահայ համայնքի երեւելի անձնաւորութիւններ հետամուտ են միջոցներ տրամադրել օգնելու համար լիարժէք վարժարան դառնալու հայց ներկայացնող փոքր- վարժարանին:

 

Դպրոցը նաեւ հանդիպման վայր է մէկ կողմէ Պոլիս ապրող հայաստանցիներուն եւ միւս կողմէ բնիկ պոլսահայոց միջեւ:

Այս բոլորէն անդին վարժարանը ունի կարեւոր ներուժ Թուրքիա ապրող հայաստանցի երեխաներուն հայկական միջավայրի մը մէջ թրքերէն լեզու սորվեցնելու տեսակէտէն:

Ու զարմանալի կամ ողբերգական կամ թշնամական թող չթուայ, որ այսօր Պոլիս ապրող մեծաթիւ հայաստանցի պատանիներ «մաքուր» թրքերէն կը խօսին:

Կան նաեւ մեծ թիւով ուրիշներ, որոնք հեռու- շատ հեռո՜ւ են հայկական միջավայրէն ու իրենց զաւակները թրքական թաղային դպրոցներ առաքելով բռնած են ձուլումի արագ ճաբան:

Վտանգաւորը «Հրանդ Տինք»ի անուան վարժարանին մէջ թրքերէն սորվիլը չէ,այլ թրքական «բապլիք սքուլ» յաճախելու երեւոյթն է, որուն մասին ալ ընդգծուած ու յստակ տեղեկութիւններու սով մը կայ: Կայ խաւ մը, որ հեռու է Պոլսոյ հայաստանցիներու շրջանակէն ու կ'ապրի եւ կը գոյատեւէ «ինքն իր մէջ»: Խխունջի պէս, Հայաստանէն դժգոհ ու պայմաններու բերումով քէն մը ապրող հայորդիներու այդ խաւը այսօր ամէն բանէ առաջ արժանի է գուրգուրանքի եւ ուշադրութեան:

Անշուշտ այս տողերը կը գրուին, ոչ թէ Պոլսոյ սիրելի համայնքակիցներուն «դաս» կամ «խելք» տալու մտադրութեամբ այլ լոյսին հանելու հարց մը, որ արժանի է բոլորի ուշադրութեան:

 

Այս եւ յառաջիկայ օրերուն «Հայ Ձայն»ի սիւնակներով պիտի փորձենք յաւելեալ լոյս սփռել Պոլսոյ հայ համայնքին ու նաեւ հոն ապրող հայաստանցիներուն մասին, այն վառ հաւատքով, որ ինչպէս երէկ այսօր ու վաղն ալ Պոլիսը պիտի շարունակէ մնալ արեւմտահայութեան կարեւոր, չըսելու համար կարեւորագոյն ափը, ուր նաեւ պիտի նետուին դէպի նոր փուլ մը անցնելու հայութեան վաղուան խարիսխները:

Ամենակարեւորն այն է, որ մենք հաւատանք այդ վառ ապագային ու չխեղդուինք սովորական դարձած տօներ ու առիթներ նշելու մեր մոլուցքի սահմանին մօտեցող արարքներուն մէջ: «Հրանդ Տինք» վարժարանին մէջ կարեւոր օր է հինգշաբթի օրը, երբ Պոլսոյ նուիրեալ քահանայ հայրերէն մին դպրոց կը ժամանէ երեխաներուն հետ կրօնքի դասեր անցընելու համար:

Ամբողջ պատմութիւնը կը սկսի այն պահուն, երբ Տ. Շիրվան քահանան Կէտիկ Փաշայի խճողուած մայթերը կտրելով կը մտնէ Աւետարանական եկեղեցւոյ շեմէն ներս:

Եւ այս մասին ... յաջորդիւ:

 

Սագօ Արեան. «Հայ Ձայն»ի Աւագ յօդուածագիր



    Լրահոս
    Հայ եկեղեցի, ՌԱԿ
    Ժամանակն է համազգային զգօնութեան. ՌԱԿ հայտարարութիւնը եկեղեցւոյ տագնապի շուրջ
    Օրացույց
    Ամենաընթերցված
    Եկեղեցական օրացույց
    /