• USD 483.03
  • GBP 617.31
  • EUR 550.85
  • RUB 7.23
  • GEL 184.54
Օգոստոս 15, 2018
Աստված այնքան սիրեց աշխարհը…

  Աստված այնքան սիրեց աշխարհը, որ մինչև իսկ իր միածին Որդուն տվեց, որպեսզի ով նրան հավատում է, չկորչի, այլ ընդունի հավիտենական կյանքըորովհետև Աստված իր Որդուն չուղարկեց աշխարհ, որ դատապարտի աշխարհը, այլ՝ որպեսզի աշխարհը նրանով փրկվի

ԱՍՏՎԱԾԱՇՈՒՆՉ (Հովհ. 3)։

Գլխավոր լուր, Հոդվածներ, Լրահոս
01.02.2018 | 16:35

Բուհի պատրաստած մասնագետները պետք է կարողանան համալրել պահանջարկը

Արցախի պետական համալսարանի խորհրդի նիստում քննարկվեց 2016-2017 ուսումնական տարում կատարված աշխատանքների մասին հաշվետվությունը, որը ներկայացրեց ռեկտոր Մանուշ Մինասյանը:

Հաշվետու ժամանակաշրջանում բուհում կարևորվել է դասախոսի արհեստավարժությունը և դասավանդման մեթոդիկան, աշխատանքներ են տարվել հանրապետությունում առկա կարող ուժերի ներգրավման, գործընկեր բուհերի մասնագետների հրավիրման և կադրերի երիտասարդացման ուղղությամբ: Համալսարանը շարունակում է աջակցել դասախոսների մասնագիտական աճին, երիտասաարդների գիտական աշխատանքների կատարմանը: Հաշվետու տարում մեկ հոգի պաշտպանել է դոկտորական, իսկ 7 հոգի` թեկնածուական ատենախոսություն:

Ընդհանուր առմամբ, համալսարանում նկատվում է ուսանողների թվի նվազման միտում, նշեց Մ. Մինասյանը: Եթե վեց տարի առաջ ԱրՊՀ-ում սովորում էր 4159 ուսանող, ապա անցյալ տարի այդ թիվը կազմել է 2677:

ԱրՊՀ հեռահար նպատակը գիտական առաջատար օղակի կայացումն է, կրթական և գիտական գործունեության հավասարակշռումը, որը ստույգ պայմաններում ռեկտորն անիրական համարեց: Հիմնավորումը հետևյալն էր` գիտությանն ուղղվող ծախսերի չափը նախահաշվում կազմել է 2,5 մլն դրամ կամ ընդհանուրի 0, 2 տոկոսը: Գիտությունը երիտասարդ կադրերին չի հրապուրում, տնտեսությունից առանձին հետազոտական պատվեր, հետևաբար նաև եկամուտներ համալսարանը չի ստանում:

Որոշակի հաջողություններ են արձանագրվել համագործակցության ուղղությամբ: ԱրՊՀ-ն ընդհանուր առմամբ 30 բուհերի հետ ունի համագործակցության պայմանագրեր: Արդյունավետ է համագործակցությունը հատկապես ՀՀ տնտեսագիտական պետական համալսարանի, ԵՊՀ-ի իրավաբանական ֆակուլտետի և Խ. Աբովյանի անվան պետական մանկավարժական համալսարանի հետ: «Մենք խնդիր ունենք ուսանողի մոտ հետազոտական և ստեղծագործ աշխատանքի ունակության, քննադատական և վերլուծական մտածողության զարգացման, ընդհանրապես նրանց նախաձեռնողականության ու նորարական զարգացման առումով»,-շեշտեց Մ. Մինասյանը:

2017թ. ֆինանսական ծախսերի կառուցվածքը չէր տարբերվում նախորդ տարիներից. եկամուտների գերակշիռ մասը գոյացել է ուսանողների ուսման վարձավարներից, իսկ ծախսերի 88 տոկսը կազմել է աշխատավարձը:

Ուսումնական աշխատանքների գծով պրոռեկտոր Գեորգի Սահակյանն իր ելույթում մտահոգություն հայտնեց համալսարանի հավատարմագրման գործընթացի կապակցությամբ, նշելով, որ դա բարդ գործընթաց է և մարդկային ու ֆինանսական զգալի ռեսուրսներ է պահանջում:

Տնտեսագիտության ֆակուլտետի դեկան Ռուզաննա Մանգասարյանը կրթության որակի բարձրացման գործում մատնանշեց վերապատրաստման դասընթացները հանրապետության սահմաններից դուրս կազմակերպելու անհրաժեշտությունը, ինչպես նաև օտարերկրյա փորձի ուսումնասիրումն ու բուհ-տնտեսություն կապը:

ԱՀ կրթության, գիտության և սպորտի փոխնախարար Արմեն Սարգսյանը քննադատաբար արտահայտվեց համալսարանի գիտական տեղեկագրի որակի և գիտական բովանդակության մասին: Նա անարդարացի համարեց, որ ժամավճարով աշխատող դասախոսների դրւյքաչափը կրկնակի ցածր է հաստիքային դասախոսների դրույքաչափից:

ԿԳՍ նախարար Նարինե Աղաբալյանն իր ելույթում անդրադարձավ վերջին տարիներին բուհի գործունեությունը կանոնակարգելուն ուղղված ջանքերին: ԱրՊՀ հետագա անելիքներից նա, մասնավորապես, առանձնացրեց բուհի հավատարմագրման գործընթացը, «Բարձրագույն կրթության» մասին նոր օրենքի կիրարկումը և համալսարանի գլխավոր շենքի հիմնանորոգումը: Հավատարմագրման առնչությամբ նախարարն ասաց, որ խնդիրը ֆինանսները հաղթահարելը չէ, այլ պահանջվող չափանիշներն ապահովելը:

Նախարարի կարծիքով` մասնագիտությունների ցանկը վերանայելու կարիք այսօր կա: Բնագիտական ուղղվածության ուսանողների թվի նվազում առկա է նաև ՀՀ-ում: Ըստ նրա` զուգահեռ աշխատանքներ պիտի տարվեն հանրակրթության և բարձրագույն կրթության ոլորտներում:

Ինչ վերաբերում է դրսում վերապատրաստվելուն, ապա նախարարի կարծիքով` պետք է ակտիվացնել համագործակցությունը տարբեր բուհերի հետ և վերապատրաստման ծրագրերից լայնորեն օգտվել:

Տնտեսության հետ թույլ կապն անթույլատրելի է, նշեց Ն. Աղաբալյանը` հավելելով, որ նախաարարության կողմից աշխատանքներ են տարվում գործատուների հետ կապն ուժեղացնելու ուղղությամբ: «Մեր պատրաստած մասնագետները պիտի համալրեն տնտեսության պահանջարկը, և այս առումով մենք ինքներս պետք է քայլ կատարենք: Գործարար շրջանակների ներկայացուցիչները պատրաստակամ են համագործակցության համար, պարզապես երևի մեր նախաձեռնողականությունն է թույլ: Առաջիկայում կփորձենք այդպիսի հնարավորություններ ստեղծել»,-խոստացավ նախարարը:

Նիստում ամփոփիչ խոսք ասաց բուհի խորհրդի նախագահ, ԱՀ Ազգային Ժողովի նախագահ Աշոտ Ղուլյանը:

«Ամեն մի ելույթում մի ինչ-որ կետ կա, որ պետք է հաջորդ աշխատանքների մեջ հաշվի առնել և ելնել այդ իրողություններից: ԱրՊՀ-ն այն հաստատությունն է, որը դիրքորոշում և քաղաքականություն է մշակում ու պետք է նաև թելադրի: Սա է այդ պատասխանատվության բաժինը: Այսինքն` մենք ոչ միայն կրթության և գիտության հետ կապված հարցեր պետք է քննարկենք ու տարվա ընթացքում իրականացնենք, այլև պետք է հաշվի առնենք, որ սրանից կախված է երկրի ապագան` եթե ոչ այսօր, ապա 5-10 տարի հետո»,- ասաց Ա. Ղուլյանը:



    Լրահոս
    Օրացույց
    Ամենաընթերցված
    Եկեղեցական օրացույց
    /