• USD 482.27
  • GBP 632.79
  • EUR 567.63
  • RUB 7.31
  • GEL 183.9
Սեպտեմբեր 24, 2018
Հպարտանում եմ

Ես հպարտ եմ իմ ճյուղերով ու սաղարթով

Բայց առավել՝ իմ արմատով

Եվ իմ բնի վաղեմությամբԺողովրդիս ծերունական 

Խիստ բնական խոհեմությամբ,

Բայց ավելի՝ Նոր շիվերի դալարությամբ -

Նրա ջահել որդիներից հենց լավերի խելառությամբ... 

ՊԱՐՈՒՅՐ ՍԵՎԱԿ

Գլխավոր լուր, Հոդվածներ, Լրահոս
10.03.2018 | 12:32

Կենսակերպ` պատմական փառավոր ժամանակի մեջ

Արցախյան շարժման տարեգրության մեջ թերևս պատշաճ կերպով չի գնահատվել 1988-ի փետրվարի 20-ին Ասկերանի շրջանի պատվիրակության մասնակցությունը Երևանի Թատերական հրապարակում անցկացված հանրահավաքին, մինչդեռ այն կարևոր նշանակություն է ունեցել Հայաստանում ազգային ոգու բարձրացման գործում: Հատկանշական են պատվիրակության անդամներ Սլավիկ Միրզոյանի և Լաուրա Մարտիրոսյանի ելույթները, որոնք խիստ տպավորել են հրապարակում հավաքվածներին: Պատվիրակությանն ընդունել է նաև ՀԿԿ կենտկոմի առաջին քարտուղար, հետագայում ՀՀ խորհրդարանում դավադրաբար սպանված Կարեն Դեմիրճյանը:

Խմբի անդամ, ներկայումս Ստեփանակերտի Աշոտ Բեկորի անվան թիվ 2 դպրոցի տնօրեն Լաուրա Մարտիրոսյանն այդ հանդիպման մասին պատմում է. «Կարեն Սերոբիչն ասաց, որ ինքը ծագումով կարսեցի է և ամեն անգամ, երբ սահմանի այս կողմից նայում է պատմական հայրենիքին, ծանր ապրումներ է ունենում: Գուցե նա մեզնից շատ ավելի հայրենասեր էր, բայց խորհրդային երկրի կարծրատիպերից ելնելով` հարցին մոտեցավ չափավորությամբ: Իսկ հանրահավաքը մեզ իրոք լիցքավորել էր: Բավական էր այն, որ հազարավոր մարդիկ հավաքվել էին հավաստելու, որ իրենք Արցախի իրենց հայրենակիցների կողքին են: Ինչ հետո պիտի տեղի ունենար` երևի թե սկիզբ առավ հենց Թատերական հրապարակից»:

…Ավարտելով Ստեփանակերտի մանկավարժական ինստիտուտի պատմության ֆակուլտետը՝ ծնունդով Հադրութի շրջանից Լաուրա Մարտիրոսյանն ամուսնացել և բնակություն է հաստատել Ասկերանի շրջանի Խնապատ գյուղում, որի միջնակարգ դպրոցում էլ աշխատել է մի քանի տարի: Նրա ամուսինը` Ասկերանի կուսշրջկոմի հրահանգիչ Գուրգեն Ասրյանը, նույնպես եղել է Երևան մեկնած պատվիրակության կազմում: Երիտասարդ ընտանիքի համար դա բավականին համարձակ քայլ էր, որովհետև եթե նրանց բանտարկեին, ապա զույգ որդիները պիտի մնային Գուրգենի ծեր ծնողների հույսին: Բայց նրանք չընկրկեցին հնարավոր վտանգների առաջ և պատվով կատարեցին իրենց առաքելությունը:

Լ. Մարտիրոսյանի մանկավարժական գործունեությունն համընկավ Արցախյան շարժման մեկնարկի հետ, երբ կազմակերպվում էին գաղտնի ստորագրահավաքներ ու ժողովներ: Ուշագրավ է 1988-ի փետրվարի սկզբին Խնապատում անցկացված կոլվարչության հաշվետու ժողովը: Կար կոլեկտիվ տնտեսությունների հաշվետու ժողովների ընթացքը փոխելու մշակված ծրագիր, ըստ որի՝ աշխատանքային կոլեկտիվները պետք է որոշում ընդունեին մայր Հայաստանին վերամիավորվելու համաձայնության մասին: Խոստովանենք, խորհրդային ինտերնացիոնալիզմի գաղափարներով դաստիարակված մարդկանց վերակողմնորոշելն այն ժամանակ դժվար գործ էր, և հիշյալ ժողովում ելույթ ունենալով` Լաուրան կարողացավ պատմաբանի ճոխ բառապաշարով ներկայացնել պատմական ճշմարտությունն ու կոչ անել խնապատցիներին` տեր կանգնելու իրենց սահմանադրական իրավունքներին: Նրա ելույթը մեծ արձագանք գտավ շրջանում և հիմք հանդիսացավ, որպեսզի Լաուրան ևս ընդգրկվի վերոհիշյալ պատվիրակության կազմում:

«Այսօրվա պես հիշում եմ. դասի ժամին դպրոցի տնօրեն Զավեն Բեգլարյանը եկավ և ասաց, որ Ասկերանից պատվիրակություն է մեկնում Երևան, որում ընդգրկված եմ նաև ես: Կես ժամից պիտի ճանապարհվեինք, ուստի մտածելու ժամանակ չկար, թեպետ տանը անկողնային հիվանդ սկեսուր և երկու մանկահասակ երեխաներ ունեի: Այն զգացումն էր, թե դա ճակատագրորեն ինձ վիճակված սուրբ առաքելություն է, և հրաժարվելն առնվազն դավաճանություն կլիներ»,-պատմում է Լաուրա Մարտիրոսյանն ու շարունակում:- Ասես Հայաստանի ողջ բնակչությունը հավաքվել էր Թատերական հրապարակում: Գալիս էին հանրապետության բոլոր շրջաններից` Արցախի հետ իրենց համերաշխությունն արտահայտող ցուցապաստառներով ու կոչերով: Ինչպիսիՙ ոգևորություն էր… Հանրահավաքի թեժ պահին, սակայն, ելույթ ունեցողներից մեկն ասաց, որ Ադրբեջանը հայտարարել է, թե իբր Ղարաբաղի հարցն իրենք լուծելու են արյան ճանապարհով: Մի պահ կարծես սառը ջուր մաղվեց հանրահավաքի մասնակիցների վրա, բայց դա մի ակնթարթ տևեց` հանրահավաքը վերստին կենդանացավ, ու ոգևորությունը նորից իր բարձրակետին հասավ»:

Երեսուն տարվա հեռվից անցած ճանապարհը գնահատելով՝ Արցախյան շարժման ակտիվիստն ու անվանի մանկավարժը գտնում է, որ հիրավի, պատմական փառավոր ժամանակաշրջան ենք ապրել: Չնայած թանկ գին է վճարվել ազատության համար, սակայն Շարժումը ճիշտ ժամանակին սկսվեց, որովհետև եթե ուշանար` Արցախի ապագան շատ մշուշոտ կլիներ:

«Այսօրվա և վաղվա խնդիրն է` մատաղ սերնդին դաստիարակել այն գաղափարով, որ նա պարտավոր է արյան գնով փրկածը սրբորեն պահպանել ու պաշտպանել»,- ասում է Լաուրա Մարտիրոսյանը:

Ոչ մի ավելորդ պաթոս նրա ասածի մեջ` դա հենց նրա կենսակերպն է:

 

 

Հատուկ ՀԱՅ ՁԱՅՆի համար

 

Ստեփանակերտ



    Լրահոս
    «Հայաստան» համահայկական հիմնադրամի տնօրենի պաշտոնում նշանակվել է Հայկակ Արշամյանը
    Օրացույց
    Ամենաընթերցված
    Եկեղեցական օրացույց
    /