• USD 482.19
  • GBP 640.83
  • EUR 561.8
  • RUB 7.64
  • GEL 196.01
Հունիս 24, 2018
Մեսրոպ Մաշտոցի թարգմանած առաջին նախադասությունը

  «Ճանաչել զիմաստութիւն եւ զխրատիմանալ զբանս հանճարոյ»

Գլխավոր լուր, Հոդվածներ, Լրահոս
14.03.2018 | 10:01

Ո՞վ է Սիրիայում քիմիական զենք օգտագործում․ ռուս-ամերիկյան նոր փոխադարձ մեղադրանքներ

Սիրիական ճգնաժամը նոր սրացման միտումներ է ցուցաբերում։ Կարծեք թե վերջնականապես հաստատվում է, որ այս արնաքամ պատերազմում քիմիական զենք, այնուամենայնիվ, օգտագործվում է։ Այլ հարց է, որ այդ զենքին առայժմ տեր կանգնող չկա․ հակամարտող կողմերը և դրանց «պաշտպանող» գերտերություններն՝ ի դեմս ԱՄՆ և Ռուսաստանի, մեկը մյուսին են մեղադրում։

Հիշեցնեմ, որ օրերս ահաբեկիչներց ազատագրված Աֆթրիս ավանում կառավարական զորամիավորումների կողմից հայտնաբերվեց քիմիական զենք արտադրելու համար նախատեսված լաբորատորիա։ Ինչպես մարտի 10-ին պաշտոնապես տեղեկացրեց Սիրիայի փոխարտգործնախարար Ֆեյսալ էլ Միգդադը, լաբորատորիայի պահեստներում գտնվել է շուրջ 24 տոննա մահացու քիմիական զենք, որն ահաբեկիչներն օգտագործում էին խաղաղ բնակչության դեմ։  Ավելին, սիրիացի պաշտոնյան նշեց, որ առկա են նաև համապատասխան հիմնավորող փաստաթղթեր և առաջարկեց արևմտյան փորձագետներին դրանք համատեղ ուսումնասիրել՝ երաշխավորելով նրանց անվտանգությունը, սակայն առայժմ այդ նախաձեռնությունը մնում է միայն առաջարկ։

Մարտի 13-ին ՄԱԿ-ի անվտանգության խորհրդում տեղի ունեցավ հերթական լեզվակռիվը, որի ընթացքում ՄԱԿ-ում ԱՄՆ ներկայացուցիչ Նիկի Հեյլին հայտարարեց, որ վերջին շրջանում Բաշար Ասադին ենթակա զորքերի կողմից երեք քիմիական գրոհ է կազմակերպվել խաղաղ բնակչության դեմ։ Թերևս, այս պարագայում ոչինչ չասվեց ապացույցների մասին, բայց տիկին Հեյլին ակնարկեց, որ ինչպես և մեկ տարի առաջ, երբ ամերիկացիները հարվածեցին Խան Շեյխունի կառավարական ավիաբազային, իր երկիրը այժմ էլ պատրաստվում է կտրուկ գործողությունների անցնել։

Բնականաբար, ՌԴ ներկայացուցիչ Վասիլի Նեբենզյան հանդես եկավ պատասխան մեղադրանքով։ Ռուս դիվանագետի խոսքերով, դեռևս մարտի 5-ին Նուսր կազմակերպության ահաբեկիչները քլոր պարունակող նյութ են օգտագործել Արևելյան Ղութայի բնակիչների դեմ, ինչը հող է նախապատրաստում ինքնիշխան Սիրիայի դեմ նոր միակողմանի գործողություններ իրականացնելու համար։ Նեբենզյայի խոսքերով,  ռուսական ու սիրիական կողմերը տեղեկություն ունեն, որ նախապատրաստվում է հերթական սադրանքը։

Սակայն  դեպքերի զարգացումները դրանով չավարտվեցին։ Արդեն մի քանի ժամ անց ՌԴ Գլխավոր շտաբի հրամանատար Վալերի Գերասիմովը հայտարարեց, որ ԱՄՆ-ը նախատեսում է հրթիռային հարվածներ հասցնել Դամասկոսի կառավարական թաղամասերի վրա։ Չհերքելով, որ այնտեղ գտնվում են նաև ռուսական զինծառայողներ և ռազմական խորհրդականներ, Գերասիմովը տեղեկացրեց, որ նրանց կյանքին վտանգ սպառնալու դեպքում ռուսական կողմը կդիմի պատասխան գործողությունների։

Որոշ վերլուծաբաններ, սակայն, կարծում են, որ բանը դրան չի հասնի և հարվածների թիրախ կդառնան ոչ թե մայրաքաղաք Դամասկոսը, այլ Ասադին հավատարիմ զորամիավորումների կոմպակտ տեղաբաշխման վայրերը։
Ինչևէ, իրադրությունը ակնհայտորեն սրվում է։ Ստեղծված իրավիճակը շատ բանով հիշեցնում է սառը պատերազմի ամենալարված ժամանակաշրջանը՝ 80-ականների սկիզբը։ Այն ժամանակ երկու գերտերությունների՝ ԱՄՆ և ԽՍՀՄ միջև անուղղակի հակամարտության թատերաբեմ դարձավ Աֆղանստանը։ Եթե չեք մոռացել, հենց Աֆղանստանից սկսվեց հանրահայտ Բեն Լադենի «փառահեղ» ուղին՝ կառավարական զորքերի դեմ պայքարողից մինչև աշխարհի ամենահայտնի ահաբեկիչ և սեպտեմբերի 11-ի կազմակերպիչ։ Հիշեցնեմ նաև, որ կառավարական զորքերին օժանդակում էին խորհրդային սահմանափակ խմբավորումները, իսկ ապստամբներին՝ Արևմուտքը։ Սա ի դեպ։

Իմ կարծիքով, այսօր աշխարհը կանգնած է ավելի մեծ փորձության առջև, քան 80-ականներին․ կտրուկ սրվել են մի քանի գործոններ, մասնավորապես՝ աշխարհաքաղաքական, կրոնական և այլն։ Միևնույն ժամանակ, շատ ավելի անկախատեսելի են դարձել այսօրվա քաղաքական գործիչների քայլերը, ինչի մասին են վկայում, մասնավորապես, վերջին շրջանում երկու գերտերությունների ղեկավարների կողմից արվող հայտարարությունները և իրականացվող քայլերը։ Վերջին վկայությունը՝ ԱՄՆ պետքարտուղար Ռեքս Թիլերսոնի երեկվա անսպասելի հրաժարականն էր։ Ամենայն հավանականությամբ, այդ պաշտոնում կնշանակվի ոչ թե մեկ այլ կադրային դիվանագետ, այլ ԿՀՎ տնօրեն Մայքլ Պոմպեոն, որին դժվար է խաղաղության ջատագով համարել։ Երևույթն աննախադեպ է, համենայնդեպս՝ նախագահ Թրամփը առաջ է քաշելու նրա թեկնածությունը, որը դեռ պետք է հաստատվի Կոնգրեսի կողմից։ Սպասենք Ռուսաստանի՞ պատասխանին։

 

Հատուկ ՀԱՅ ՁԱՅՆի համար



    Լրահոս
    Օրացույց
    Ամենաընթերցված
    Եկեղեցական օրացույց
    /