• USD 482.67
  • GBP 650.4
  • EUR 570.76
  • RUB 7.88
  • GEL 197.52
Մայիս 23, 2018
«Մեր կուսակցության նախաբանն է Ժողովրդին, ժողովրդով, ժողովրդի համար:

Այժմ ցանկանում եմ հայտարարել՝ այսուհետ մեր նախաբանն է Երիտասարդներին, երիտասարդներով, երիտասարդ Հայաստանի համար: Կեցցեք բոլորդ: Շուտով այնքան զորանանք, որ անցնենք Արաքսի մյուս ափին և Արարատ լեռը մյուս կողմից դիտենք: Գալիք տարի էլ հանդիպենք Վանում...»

Վարդան Նազիրյան, Հայաստանակենտրոն Ռամկավար Ազատական Կուսակցության Գերագույն Խորհրդի Ատենապետ

Գլխավոր լուր, Հոդվածներ, Լրահոս, Մեր ձայնը, Խմբագրական
16.05.2018 | 14:01

Օղակը Կը Սեղմուի Իրանի Շուրջ

Արդէն հրթիռներ սկսած են փոխանակուիլ Իսրայէլի եւ Սուրիոյ մէջ տեղակայուած իրանեան ուժերու միջեւ, եւ վարչապետ Նեթանիահու ճամբորդած է Մոսկուա, Փութինի իշխանութենէն պահանջելու, որ օդային պաշտպանութիւն չնծայէ իրանեան ուժերուն` իսրայէլեան հրթիռներու դէմ: Միւս կողմէ, ամերիկեան ծովային ուժերը մօտեցած են Եմէնի ափը, զսպելու համար Հութհի ըմբոստ ուժերը, որոնք կը սպառնան Սէուտական Արաբիոյ եւ ամբաստանութեան տակ են, որ ենթակայ են իրանեան իշխանութեանց:

Այս կերպով նոր պատերազմի մը թատերաբեմը կը պատրաստուի Միջին Արեւելքի մէջ:

Բոլոր այս տեղաշարժներուն ազդանշանը տրուեցաւ երբ անցեալ շաբաթ նախագահ Տանըլտ Թրամփ յայտարարեց, որ կը ջնջէր Իրանի հետ ստորագրուած հիւլէական ուժի սահմանափակման դաշնագիրը, զոր նախորդ իշխանութիւնը, նախագահ Օպամայի օրով, երկու տարուան բանակցութիւններէ ետք, յաջողած էր իրականացնել£

Դաշնագրին տակ ստորագրած են եօթ պետութիւններ, ի շարս որոնց ՆԱԹՕ-ի անդամներ, ինչպէս, Ֆրանսա, Անգլիա եւ Գերմանիա: Այս վերջինները անյոյս կերպով պայքարեցան, որ նախագահ Թրամփ չառնէ այդ վտանգաւոր քայլը: Ֆրանսայի նախագահը` Էմմանուէլ Մաքրոն գնաց մինչեւ Ուաշինկթըն եւրոպացիներու տեսակէտը պարզելու ամերիկեան իշխանութեանց: Նախագահ Թրամփ բացի շքեղ ճաշկերոյթներէ եւ Մաքրոնի բաճկոնին փոշին սրբելէն ուրիշ զիջում չկատարեց:

Ամերիկայի այս նախաձեռնութեամբ կը տուժեն նաեւ Եւրոպայի դաշնակիցները, որոնք առեւտրական կապեր ունին Իրանի հետ: Ամերիկայի գանձային նախարարութիւնը, իր հերթին, հրահանգած է ՙՊոյինկ՚ ընկերութեան, որ ջնջէ Իրանի հետ ստորագրուած 19 միլիառ տոլարի օդանաւային վաճառքի պայմանագիրը: Թէ ինչպէս կը փակէ Ամերիկա այդ վնասը, պարզ է՝ ՙՊոյինկ՚ ընկերութեան կ'ապսպրէ ռազմական նոր օդանաւեր, որոնց կարիքը չունի:

Իրանեան կողմի վրայ Թրամփի որոշումը դիմաւորուած է զսպուածութեամբ եւ յայտարարուած, որ Թեհրան պիտի շարունակէ յարգել պայմանագրով սահմանուած իր պարտաւորութիւնները: Այսուհանդերձ, քաղաքական ճնշումի ալիք մը կը ստեղծէ Թրամփի որոշումը Իրանի մէջ, նոյնիսկ եթէ պատերազմի չ'առաջնորդէ, ինչ որ անհաւանական է: Նաեւ տկարացող տնտեսութիւնը աւելի եւս կը տկարացնէ, ականահարելով նախագահ Հասան Ռուհանիի վերջին շրջանի քաղաքական ձեռքբերումները եւ աւելի կը զօրացնէ իրանեան պահպանողական ծայրայեղական թեւը, որ սկսած է Ռուհանին մեղադրել, որ վստահած էր անվստահելի ամերիկացիներու խոստումներուն:

Ուշ կամ կանուխ Թրամփ ի վերջոյ պիտի գար քանդելու Օպամայի խաղաղասիրական այս արարքը, որ աւելի հաւանական դարձաւ իր անմիջական իշխանութեան մէջ ներգրաւումովը երկու ռազմատենչ քաղաքագէտներու` պետական քարտուղար Մայք Փոմփէոյի եւ ապահովութեան խորհրդատու Ճոն Պոլթընի, պարտադրելով սովորաբար լռակեաց

Օպաման, որ մեղադրէ այս արարքը ըսելով. ՙԱյս քայլը կրնայ առաջնորդել երկու վնասակար ելքերու - կամ հիւլէական զէնքերով զինուած Իրանի մը եւ կամ նոր պատերազմի՚:

Նախագահ Օպամայի դահլիճի անդամ եւ ապահովութեան խորհըրդատու Սուզըն Ռայս, քայլ մը անդին երթալով իր պետէն, յօդուած մը հրատարակած է ՙՆիւ Եորք Թայմզ՚-ի մէջ հետեւեալ վերնագիրով ՙՑարդ Թրամփի ամէնէն տխմար որոշումը՚: Սոյն յօդուածին առաջին պարբերութիւնը կ'ըսէ. ՙՆախագահ Թրամփի անպատասխանատու որոշումը քաշուելու Իրանի հետ կնքուած պայմանագիրէն. պիտի չպարտադրէ այդ երկիրը վերադառնալու բանակցութեան սեղանին, ոչ ալ պայման մը պիտի հանդիսանայ Իրանի այլ անընդունելի արարքներու վերացման: Այլ պիտի քաջալերէ, որ Իրան զինուի հիւլէական զէնքերով եւ հեղհեղուկ Ամերիկա մըն ալ մեկուսացուի իր դաշնակիցներէն՚:

Ամերիկեան մամուլը արդէն սկսած է արտայայտուիլ նախագահ Թրամփի այս որոշման մասին: Բնականաբար Իսրայէլի վարչապետը փութացած է ՙարի եւ խոհեմ քաղաքական որոշում մը՚ բնութագրել նախագահ Թրամփի յայտարարութիւնը, որուն դիմաց նախկին նախագահական թեկնածու եւ պահպանողական քաղաքական մեկնաբան Փեթրիք Պիւքէնըն ՙՖոքս՚ հեռուստակայանին տուած հարցազրոյցի մը ընթացքին ըսած է. ՙՊիպին (Պենիամին Նաթանիահու) կ'ուզէ, որ Ամերիկա պատերազմի մտնէ Իսրայէլի հաշուոյն՚:

Ի դէպ, Պիւքէնըն, ժողովրդական քաղաքական մեկնաբան մըն էր, գրեթէ բոլոր ամերիկեան հեռուստակայաններու վրայ: Այն օրը, որ համարձակցաւ ըսել, թէ Ամերիկայի շահերը, գերիվեր են Իսրայէլի շահերէն, իր աստղը մարեցաւ բոլոր կայաններու վրայ եւ այսօր սակաւ առիթներով կը լսուի անոր ձայնը: Յատկանշական ցուցանիշ մը Ամերիկայի ազատ մամուլին մասին:

Միջին Արեւելքի բոլոր պատերազմներուն քաղաքական փիլիսոփայութիւնը սահմանուած է Հիլըրի Քլինթընի մէկ գաղտնազերծուած նամակին մէջ, որ կ'ըսէր. ՙԿործանենք Սուրիան, Իսրայէլի համար՚: Պիւքենընի ընդվզումը այս սկզբունքին դէմ է, որուն ետին զօրաշարժի կ'ենթարկուի Ամերիկայի հզօր ոյժը` ՙԱրաբական գարուն՚ կամ այլ անուններու ներքեւ, երկիրներ քանդելու եւ ժողովուրդներ դժբախտացնելու:

Նախընթացները ցոյց կու տան, թէ երբ Իսրայէլի ընդդիմացող որեւէ երկիր կ'ապազինուի կամ մեղայի կու գայ` ատիկա չերաշխաւորեր իր ապահովութիւնը, այլ` տկար վիճակի մէջ աւելի խոցելի կը դառնայ կործանման, ինչպէս պատահեցաւ Իրաքի եւ Լիպիոյ պարագային:

Երկուքն ալ զոհերն էին Իսրայէլի զոհասեղանին. եւ խոստացուած կեղծ ՙգարունը՚, ուրիշ բան չէր բացի իշխանութիւն տապալելու արարքէն:

Միայն Իրաքի պատերազմին Ամերիկա տուաւ 5000 զոհ ռազմադաշտի վրայ եւ վրադիր 5000 ալ անձնասպանութիւններ կատարուեցան Իրաքէն վերադարձող վեթերաններու շարքերուն մէջ, թող զկանայս եւ մանկտիք, աւելի քան 25.000 հաշմանդամներով բեռնաւորուեցաւ ամերիկեան հասարակութիւնը: Իսկ վատնուած երեք թրիլիոն տոլարով ինչքան բնակարաններ, հիւանդանոցներ եւ ինչքան բարիք կարելի էր ապահովել: Փեթրիք Պիքենըն այս հեռանկարն է, որ կը պարզէ եւ կ'ամբաստանէ Ուաշինկթընի իշխանութիւնները, որոնք այլ երկրի մը հաշուոյն կը թափեն ամերիկացի երիտասարդութեան արիւնը եւ կը վատնեն երկրին հարստութիւնը:

Իրանը ամէնէն մօտիկ բարեկամ երկիրն է Հայաստանի. կարելի է նոյնիսկ բնորոշել իբրեւ վստահելի շնչերակներէն մէկը: Իրանի աղքատացումը ծանրօրէն կ'անդրադառնայ Հայաստանի տնտեսութեան վրայ, տրուած ըլլալով, որ միւս դրացին` Վրաստանը պիտի շարունակէ մնալ Հայաստանի թշնամի-բարեկամը: Վրաստան, ամէն կարգի անհեթեթ պատահարներով կը փակէ սահմանը արտաքին աշխարհի հետ եւ որեւէ պարագային կրնայ խեղդամահ ընել մեր երկիրը: Արդէն, Հայաստան առաքուած զինամթերքը երկար շրջապտոյտ մը կը կատարէ տեղ հանելու համար, որովհետեւ մեր բարեկամ Վրաստանը արգելքներ կը յարուցանէ անոր փոխադրումին դէմ:

Իսկ միւս կողմէ Հայաստան ոչ միայն բարեկամ եւ դաշնակից Իրան մը պիտի կորսնցնէ, այլ ճնշումի պիտի ենթարկուի Արեւմուտքի կողմէ, որ Ազրպէյճանի նման գործակցութիւն ցուցաբերէ Արեւմուտքին, իբրեւ իր բարեկամութեան եւ բարեացակամութեան նշանը: Պարտադրանք մը, որ քաղաքական անձնասպանութիւն պիտի նշանակէ մեր երկրին համար:

Երբ պատերազմի ամպերը կը թանձրանան մեր անմիջական երկնակամարին վրայ` ալ ներհայցողութեան ժամանակը չէ: Հայաստանը օր առաջ պէտք է կարգի դնէ իր տունը եւ տէրը դառնայ իր սահմաններուն:

Յեղափոխութենէն ետք ներքին ապահովութիւնը երաշխաւորեցին երկու հակադիր կողմերը. հիմա ատենն է, որ կարգի բերուի մեր արտաքին քաղաքականութիւնը, որ կրնայ շուտով խառնել մեր տան ներքին հաշիւները:

Խաղաղութիւն եւ համերաշխութիւն ներքին ճակատի վրայ եւ ապահովութիւն արտաքին ճակատի վրայ:

Վտանգաւոր ժամանակներու մէջ կ'ապրինք:

 

 

Խմբագրական Պայքար շաբաթաթերթիդրոշակակիր պաշտոնաթերթ Ռամկավար Ազատական կուսակցության

 



    Լրահոս
    ՌԱԿ
    ՌԱԿ պատվիրակությունը հանդիպել է ՀՀ նախագահ Արմեն Սարգսյանի հետ
    Օրացույց
    Ամենաընթերցված
    Եկեղեցական օրացույց
    /