• USD 482.02
  • GBP 634.24
  • EUR 557.5
  • RUB 7.59
  • GEL 195.94
Հունիս 20, 2018
Իշխելու համար իմաստություն է պետք

Իշխանների համար ավելի կարևոր է հարստանալ իմաստությամբ ու առաքինությամբ, քան մեծագանձ ճոխությամբ, իսկ ով չգիտի իր կրքերի վրա իշխել, չի կարող ուրիշներին իշխան լինել:                                 

                                             ՊՈՂՈՍ ՊԱՏՐԻԱՐՔ ԱԴՐԻԱՆՈՒՊՈԼՍԵՑԻ

Լրահոս, Մեր ձայնը, Խմբագրական
05.06.2018 | 21:20

Մեր թաւշեայ յեղափոխութիւնը

Հայաստանի ժողովուրդը տօնախմբութեան մէջ է` թաւշեայ յեղափոխութեան տարած յաղթանակով: Արդարեւ, Մայիս 8-ին, յեղափոխութեան ռահվիրան` Նիկոլ Փաշինեանը դարձաւ վարչապետ, շաբթուան մը քաղաքական խաղերէ ետք: Յեղափոխութեան յաղթանակի տօնախմբութիւններէն ետք վրայ հասան նաեւ Սարդարապատի յաղթանակին եւ Առաջին Հանրապետութեան հիմնադրութեան հարիւրամեակները երկարաձգելով ժողովրդային տօնախմբութեանց մթնոլորտը:

Այդ տօներէն ետք, եւ բնականոն կեանքի վերսկսման հետ ժողովուրդը եւ պետութիւնը պիտի նստին խորհելու, խոկալու եւ վերլուծելու պատահածը եւ հունաւորելու ժողովրդային խանդավառութիւնը կեանքի առարկայական իրապաշտութեան սահմաններուն մէջ:

Պետական խաղաղ յեղաշրջումը իր ցնծութեան ալիքները տարածեց նաեւ մինչեւ Ամերիկայի հեռաւոր անկիւնները, ամէնուրեք սփռելով լաւատեսութեան ալիք մը: Նիկոլ Փաշինեանի այցելութիւնները Արցախ, Սոչի եւ Վրաստան ոգեւորութեան ալիք տարածեցին նաեւ այդ շրջաններու հայութեան մօտ, անկախ այդ այցելութեանց քաղաքական անդրադարձէն:

Նիկոլ Փաշինեան քաղաքական եւ հոգեբանական տրամադրութիւնները օգտագործեց յաջողութեամբ պսակելու իր ՙքայլ արա՚ շարժումը, թէեւ այդ յաջողութեան սատարեցին նաեւ իշխանաւորները` Սերժ Սարգսեանով, Հանրապետական կուսակցութեամբ եւ անոնց շահակից օլիկարխներով` ժողովուրդին հանդէպ իրենց ցուցաբերած անզգամութեամբ, օրէնքը հեգնանքի վերածելու ծիծաղելիութեամբ, ի մի բան` անջատուելով զանգուածէն եւ հակադրուելով անոր արդար պահանջներուն եւ իրաւունքներուն:

Հիմա, յեղափոխութիւնը յաջողեցնելը մէկ բան է եւ երկիր կառավարելը` ուրիշ բան: Յեղափոխութեանց եւ յեղաշրջումներու մեծամասնութիւնը իրագործուած է արիւնահեղութեամբ եւ սակաւ են այն օրինակները, ուր յեղափոխական առաջնորդները հանդիսանան յաջող եւ կարող պետական դէմքեր: Սակայն, հայ ժողովուրդը այս պարագային, իր յոյսը դրած է այն փաստին վրայ, որ այս մէկը այդ յեղափոխութիւններուն իրագործուած է խաղաղ պայմաններու տակ, սիրոյ եւ համերաշխութեան մթնոլորտի մէջ ու պատուած` թաւիշով:

Նիկոլ Փաշինեանի կոչերը` ժողովուրդը ոտքի հանելու, իրականացան ելեկտրական մթնոլորտի մէջ. ան մէկ խօսքով յաջողեցաւ անդամալուծել երկիրը եւ փակել քաղաքներու փողոցները: Ներկայիս հարց է թէ սիրոյ եւ համերաշխութեան իր կոչերը միեւնոյն ներգործութիւնը պիտի ունենա՞ն միեւնոյն զանգուածին վրայ, որ դեռ իր սրտին մէջ կը սնուցանէ արդար զայրոյթը նախորդ իշխանութեանց եւ անհատ իշխանաւորներու նկատմամբ:

Նուրբ խնդիր մըն է նաեւ թէ ի՞նչ անդրադարձ պիտի ունենայ այն խոստումը զոր ինք տուաւ յանուն ժողովուրդին` ՙվանտեթթան բացառելու՚: Ընկերային ցանցերու մէջ երեւցող

անմակարդակ երեւոյթները դեռ երաշխիքի հիմքը չեն տար, որ յեղափոխութեան ռահվիրային պատգամը տեղ հասած է:

Ոստիկանապետ Վլատիմիր Օսիփովը հոգէառ հրեշտակն էր բոլոր ցուցարարներուն մինչեւ յեղաշրջումի օրը. սակայն Փաշինեան խոհեմ եւ նշանակալից որոշումով մը զայն վերահաստատեց իր պաշտօնին վրայ եւ ժողովուրդը անմիջապէս համակերպեցաւ այդ որոշման, որովհետեւ վարչապետին խօսքը տակաւին կը պահէ իր կախարդանքը: Այդ որոշումով նոյնպէս ազդանշան մը հանդիսացաւ, որ Փաշինեանի կողմէ տրուած երաշխաւորութիւնը թէ ՙվանտեթթա չկայ՚ գործնական նշանակութիւն ունի: Այդ ըսել է նաեւ թէ փրոֆեշընըլ զինուորը, որ հասարակութեան կարգապահութեան հսկած է, միեւնոյն մասնագիտական պատասխանատուութեամբ կրնայ գործել որեւէ վարչակարգի ներքեւ:

Խոհեմութեան ուրիշ դրսեւորում մըն էր Նիկոլ Փաշինեանի վերաբերումը քաղբանտարկեալներու նկատմամբ. արդարեւ, ան ցոյց տուաւ թէ այն կալանաւորները, որոնք ձերաբակալուած էին քաղաքական նկատարումներով` անոնց հարցը կարելի էր լուծել քաղաքական որոշումով. իսկ այն ազատազրկեալները, որոնք առնչուած էին ոճիրներու հետ, որքան ալ կատարուած ըլլային քաղաքական նպատակներով, պէտք է լուծում գտնէին օրէնքի ճամբով. անոր համար է որ ինք յայտարարեց. ՙԵս չեմ կրնար այսօր բանտերու դռները բանալ եւ բոլոր բանտարկեալները դուրս դնել՚:

Միւս կողմէ, Ալեքս Հոլտինկի (Սամուէլ Ալեքսանեան) դէմ շղթայազերծուած հետապնդումները նշանակալից պիտի ըլլան: Օլիկարխ Ալեքսանեանը յայտնի է իր շահատակութիւններով, եւ ընկերային ցանցերը միահամուռ կերպով կողմնակից են, որ նշեալ օլիկարխը իր ունեցածը փոխադրէ օրէնքի սահմանէն ներս: Սակայն, եթէ այդ արդարացի ընդվզումը առաջնորդէ լինչի մթնոլորտի հոգեբանութեան, այդ պարագային արդար առեւտուրով շահուած դրամագլուխները կը վտանգուին եւ անոնց տէրերը հակամէտ կ’ըլլան արտասահման փոխադրելու իրենց դրամագլուխը: Արդէն հսկայ դրամագլուխներ ձգած են երկիրը` վախի եւ անստուգութեան հեռանկարի բերումով: Հետեւաբար խոհեմ պետական մարդու վերաբերումը պիտի ըլլայ դրամագլուխները ներդնել երկրին մէջ, ի շահ տնտեսութեան զարգացման, որքան ալ տարբեր ըլլան ժողովուրդին զգացական տրամադրութիւնները:

Շարժումի ամբողջ տեւողութեան Նիկոլ Փաշինեան չէր անդրադարձած երկրի արտաքին քաղաքականութեան եւ պաշտպանութեան խնդիրներուն, որովհետեւ այնքան հրատապ էին ժողովուրդին կենցաղային հարցերը, կենսամակարդակը, հայաթափութիւնն ու օրէնքի խախտումները: Սակայն Փաշինեան իշխանութեան գալով հարկադրուած է առերեսուիլ նաեւ այդ հարցերով:

Բանակը երկրին ողնասիւնն է վարչապետը առաջին հերթին անդրադարձաւ բանակի ներքին բարելաւման եւ նոյնիսկ անհատ զինուորի առօրեական պահանջներուն: Այսպիսի կեդրոնացում պիտի բացառէ այնպիսի բացթողումներ, որոնք բացայայտուեցան ապրիլեան պատերազմի ընթացքին:

Գալով Հայաստանի արտաքին քաղաքականութեան` ճիշդ է որ երկրին դեմոկրատացումը աւելի ցցուն պիտի դարձնէ հարեւան Ատրպէյճանի ղեկավարին` Իլհամ Ալիեւին բռնատիրական պատկերը, սակայն մեծ պետութիւններ այդ տուեալներով պիտի չսահմանեն իրենց յարաբերութիւնները Հայաստանի հետ:

Փաշինեան իր առաջին ուղեւորութիւնը կատարեց դէպի Ռուսաստան` Սոչի մասնակցելու համար Եւրասիական տնտեսական համաժողովին: Այդ կազմէն ներս յայտնի է վերաբերումը Փաշինեանի անձին նկատմամբ: Արդարեւ, անոր գլխաւորած խումբը Հայաստանի խորհրդարանին մէջ ատենին առաջարկ ներկայացուցած էր, որ Հայաստան դուրս պէտք է գայ տնտեսական այդ կառոյցէն: Սոչիի մէջ, հակառակ Փութինի զուարթախոհ (հիւմըրով) ընդունելութեան, Ղազախստանի նախագահին, Նուրսուլթան Նազարպայեւի ցուրտ վերաբերումին մէջ յայտնի էր, թէ չէր մոռցուած ամէն ինչ:

Վարչապետին Վրաստան կատարած այցելութիւնը ոգեւորիչ էր տեղւոյն հայութիւնը շարժելու իմաստով սակայն պարզ է որ քաղաքական յարաբերութիւնները կը մնան նոյնը. զարմանալի չէր, ուրեմն, որ Փաշինեան միեւնոյն բառերով եւ բացատրութեամբ բնորոշեց Հայաստան-Վրաստան յարաբերութիւնները, ինչ բացատրութեամբ, որ բնորոշած էին նախկին վարչակարգի ներկայացուցիչները. ՙԵրկու երկիրներու միջեւ չկան հարցեր, որոնք անլուծելի են՚: Ուրեմն, կան հարցեր դեռ չլուծուած եւ պիտի լուծուին օր մը - Հայաստանի քաղաքացիներուն եւ ապրանքի տարանցումը Վրաստանի սահմանով, հայկական եկեղեցիներու գրաւումը, Ջաւախքի հայութեան նկատմամբ խտրականութիւններու քաղաքականութիւնը, եւայլն:

Գալով թշնամի երկիրներուն` Թուրքիոյ նախագահ Էրտողան յայտարարեց, թէ Թուրքիա պատրաստ էր բանակցելու Հայաստանի հետ եթէ Երեւան ՙտրամաբանական՚ առաջարկներով հանդէս գայ. հիմա արդէն ծանօթ է աշխարհին թուրքին ՙտրամաբանութիւնը՚:

Հայաստանի ներքին իրադարձութիւններէն օգտուելով Ատրպէյճան ամրացուցած էր իր դիրքերը Նախիջեւանի մէջ, ուրկէ Ալիեւ սպառնացած է հրթիռակոծել Հայաստանի սիրտը` Երեւանը:

Հետեւաբար, արտաքին աշխարհի վերաբերումը Հայաստանի նկատմամբ բարելաւում չէ արձանագրած, չընելու համար, որ վատթարացած է իր անմիջական դրացիներու պարագային:

Հայաստանի երիտասարդ իշխանութիւնը այսօր կը գտնուի հսկայ մարտահրաւէրներու դիմաց` արտաքին ու ներքին քաղաքականութեան մէջ: Միակ մխիթարութիւնը, որ շօշափելի իրականութիւն մըն է, ժողովուրդին ներքին միասնականութիւնն է, որ կրնայ յաղթահարել ամէն դժուարութիւն:

Միայն թէ Նիկոլ Փաշինեան եւ իր շարժումին առաջնորդները, որոնք բոցավառեցին ժողովուրդը եւ գործի լծեցին անոր մտաւորական սերուցքը, կարենան յաջողիլ յեղափոխութիւնը պահել իր թաւշեայ ծածքին տակ:

 

Խմբագրական  «Պայքար» շաբաթաթերթի, դրոշակակիր պաշտոնաթերթ Ռամկավար Ազատական կուսակցության



    Լրահոս
    Օրացույց
    Ամենաընթերցված
    Եկեղեցական օրացույց
    /