• USD 482.19
  • GBP 640.83
  • EUR 561.8
  • RUB 7.64
  • GEL 196.01
Հունիս 24, 2018
Մեսրոպ Մաշտոցի թարգմանած առաջին նախադասությունը

  «Ճանաչել զիմաստութիւն եւ զխրատիմանալ զբանս հանճարոյ»

Գլխավոր լուր, Հոդվածներ, Լրահոս
14.06.2018 | 14:30

Գալիք օրերը «պայծառ» պիտի չըլլան Էրտողանի համար...

10 օրեր մեզ կը բաժնեն Թուրքիոյ արտահերթ ընտրութիւններէն։ Վերջին ընտրութիւնները կայացած էին 2015 թուականի յունիսին, որու արդիւնքով ալ կազմուած խորհրդարանին մէջ կառավարութիւն կազմելու բաւարար քուէներ չունեցող իշխող «Արդարութիւն եւ զարգացում» կուսակցութիւնը, գլխաւորութեամբ Ռէճէփ Թայէպ Էրտողանի, չէր կրցած նոր կառավարութիւն կազմել ու այդ պատճառով ալ ընտրութիւնները կը կրկնուէին նոյն տարուան նոյեմբերին։

 

Ընտրութիւններուն յաջորդող առաջին երկու տարիներուն երկիրը իր ձեռքերուն մէջ «ամուր» պահած Էրտողան աւելի ուշ կը դիմագրաւէր բաւականին բարդ խնդիրներ, որոնց հետեւանքով ալ ան կը յայտնուէր «քրիթիք» վիճակներու մէջ։

 

 

Սուրիական պատերազմի մէջ «խաղաքարտեր»ու սպառումը, երկրի քրտական շրջաններուն մէջ զինեալ գործողութիւնները, բայց մանաւանդ ամէն օր խորացող տնտեսական ճգնաժամը ցոյց կու տային, որ երկիրը «Օսմանացնելու» տանող էրտողանի վարչակարգը այդքան ալ խաղաղ եւ հեզասահ ձեւով չի կրնար առաջնորդել Թուրքիան։

Այս բոլորէն անդին այսօր ստեղծուած է այնպիսի «նոր» իրավիճակ մը, որ գոյութիւն չունէր մօտիկ անցեալին։

 

Խօսքը «Միլլիյէթ» դաշինքին մասին է, որուն մէջ ներգրաւուած են չորս հիմնական քաղաքական ուժեր, որոնք բոլորն ալ իրենց սեղանին դրած են մէկ օրակարգ, որն է տապալել ՝ Էրտողանը։

 

Ի դէպ այս ընտրութիւնները միայն Միլլի Մէճլիսի (խորհրդարանի) ընտրութիւններ չեն, այլ նաեւ նախագահական ընտրութիւններ են։

 

Տեղի ունեցած վերջին վիճակագրութեանց համաձայն Էրտողան պիտի չկարողանայ հաւաքել նախագահ ընտրուելու անհրաժեշտ 51 առ հարիւրը եւ եթէ այդպէս պատահի,  ապա յստակ է, որ ընտրութիւններու համար նախատեսուած յաջորդ փուլը «պայծառ» օրեր պիտի չտայ Էրտողանին։ Այն իմաստով, որ առաջին փուլին գրեթէ բոլոր քիւրտերը միանշանակ կերպով իրենց քուէները պիտի տան HDP քրտամէտ կուսակցութեան բանտարկուած առաջնորդ Սալահէլտին Տէմիրթաշին, ապա երկրորդ փուլին նոյն այդ քիւրտերը իրենց քուէները սիրով պիտի «տրամադրեն» ընդդիմութեան միացեալ առաջնորդ դարձած Մուհարրէմ Ինճէյին։

 

Քէմալիստ հիմունքներով կառավարուող Ժողովրդահանրապետական (CHP) կուսակցութեան այս ներկայացուցիչը, որուն երկրի քաղաքական հարթակի վրայ երեւիլը «նոր շունչ» մը կուտար այդ կուսակցութեան, խոստացած է դառնալ «բոլոր թուրքեր»ուն նախագահը։ Ինճէյէն բացի Էրտողանէն ու անոր կուսակցութիւնէն մեծ թիւով քուէներ «գողնալու» առաքելութիւն ստանձնած մէկ այլ ազդեցիկ գործիչ մը Մէրալ Աքշէները, որ մօտիկ անցեալին անդամակցած է «Գորշ գայլեր»ու կուսակցութեան եւ այսօր մէկդի չդնելով հանդերձ իր ազգայնական մօտեցումները հանդէս եկած է «Իյի» կուսակցութեամբ։

 

 

Ամէն պարագայի գետնի վրայ տեղի ունեցող զարգացումները ու յատկապէս էրտողանի կողմէ օրըստօրէ աւելի «բուռն» դարձող ելոյթները ցոյց կու տան, որ իսլամական քողով եւ Օսմանեան կայսրութեան «երազանք»ով հրապարակ ելած Թուրքիոյ «սուլթան»ին վիճակը բարդ կրնայ ըլլալ։

 

 

Էրտողան կրնայ երկրորդ փուլի աւարտին շահիլ Թուրքիոյ ընտրութիւնները եւ այդպիսով ընտրուիլ նախագահ, սակայն այս ընտրութիւններու աւարտին ան հանրութեան եւ աշխարհին պիտի ներկայանայ որպէս բաւական թուլացած դիրքերէ խօսող առաջնորդ մը, որուն առջեւ պիտի ցցուին մեծ ու փոքր բազմապիսի խնդիրներ եւ որոնց ամէնէն «թէժ»ն ու վտանգաւորը պիտի ըլլայ տնտեսական թղթածրարը, որ կրնայ որեւէ պահու «ներս»էն պայթեցնել Թուրքիան։

 

 



    Լրահոս
    Օրացույց
    Ամենաընթերցված
    Եկեղեցական օրացույց
    /