• USD 482.44
  • GBP 637.06
  • EUR 564.6
  • RUB 7.28
  • GEL 184.28
Սեպտեմբեր 24, 2018
Հպարտանում եմ

Ես հպարտ եմ իմ ճյուղերով ու սաղարթով

Բայց առավել՝ իմ արմատով

Եվ իմ բնի վաղեմությամբԺողովրդիս ծերունական 

Խիստ բնական խոհեմությամբ,

Բայց ավելի՝ Նոր շիվերի դալարությամբ -

Նրա ջահել որդիներից հենց լավերի խելառությամբ... 

ՊԱՐՈՒՅՐ ՍԵՎԱԿ

Հայաշխարհի ձայն, Լրահոս, Հայաստան
12.07.2018 | 16:20

Հերքում. ՀԱՅ ՁԱՅՆ-ի հրապարակմանն արձագանքում է Գևորգ Յազչյանը

Ներկայացնում ենք  պատմաբան, Լիբանանի Խմբագիրների արհմիության եւ Լիբանանի Լրագրողների միության անդամ Գևորգ Յազչյանի հերքումը՝ ՀԱՅ ՁԱՅՆ լրատվականի՝  «Դիվանատուն ներխուժածներից ոմանք գտնվել են թմրանյութի ազդեցության տակ, հարուցվել է քրեական գործ. խմբի իրական դեմքը բացահայտվում է» հրապարակման:

 

     «Հայ ձայն» էլեկտրոնային պարբերականի խմբագրության,

Պարբերականի հուլիսի 10-ի նյութերում հայտնվել է Գոհար Ավետիսյանի «Դիվանատուն ներխուժածներից ոմանք գտնվել են թմրանյութի ազդեցության տակ, հարուցվել է քրեական գործ. խմբի իրական դեմքը բացահայտվում է» հրապարակումը: Ընթերցողի առաջին տպավորությունն այն է լինում, որ դա նույն Գ. Ավետիսյանի եւ /կամ պարբերականի խմբագրության տեսակետ/ համոզումն է, մինչդեռ ամբողջ հրապարակումը հիմնված է Մայր Աթոռի միաբան Գեւորգ եպս. Սարոյանի ասածների վրա: Լրագրողական բարոյականության նորմերը պահանջում էին, որ վերնագրում արտացոլվեր այդ փաստը` «Ըստ Գեւորգ եպս. Սարոյանի», «Ըստ Մայր Աթոռի միաբանի» կամ նման սկզբնական ձեւակերպումով, կամ էլ, առնվազն, վերնագրի արտահայտությունը առնված լիներ չակերտների մեջ:

Ամբողջական պատասխանը Գեւորգ եպիսկոպոսի արտահայտություններին` մի ամբողջ գրքույկի հեղինակ էր դարձնելու ինձ: Սակայն նրա արտաբերած գոնե երեք մեղադրանքների հանդեպ չեմ կարող լռել:

1. Գեւորգ եպիսկոպոսը մեղադրում է «խմբի անդամներին», որ երջանկահիշատակ հայրապետներ Վազգեն Ա-ին եւ Գարեգին Ա-ին ու այժմու գահակալին «անվանել են» Կա Գե Բե-ի գործակալներ: Սա ստոր զրպարտություն է: Կորյուն աբեղա Առաքելյանը իր ելույթներից մի քանիսում հայտարարել է, որ հիշյալներին Մայր Աթոռի հայրապետական գահին բերել է Կա Գա Բե-ն` նկատի ունենալով ՀԽՍՀ ու նրան հաջորդած ՀՀ գաղտնի սպասարկություններին, ավելի ճիշտ` օրվա իշխանություններին: Վազգեն վեհափառի հարցում Կորյուն հայր սուրբի հաստատումը ԼԻՈՎԻՆ համապատասխանում է իրականության. ավելին, այդ մասին վկայում է նույնինքն երանաշնորհ հայրապետը իր մի ելույթում, որը տեղ է գտել լրագրող Հովհաննես Պապիկյանի «Ոգու հերկը» գրքում: Հայրապետը հայտնում է, որ Ռումինիայի թեմի առաջնորդ եղած ժամանակ մի օր իրեն այցելում են երկու հոգի եւ առաջարկում ընդունել Ամենայն Հայոց հայրապետի լուծը: Երկուսն էլ եղել են Կա Գե Բե-ի գործակալներ: Սա, իհարկե, չի նշանակում, թե Վազգեն վեհափառը եղել է Կա Գե Բե-ի գործակալ: Հույժ ցավալի է, որ եպիսկոպոսի աստիճանով մարդիկ «Կա Գե Բե-ի դրածոներ» արտահայտությունը խեղաթյուրել են «Կա Գե Բե-ի գործակալների»` ինչ է թե դա ծառայեցնեն նախաձեռնությունը արատավորելու իրենց գերնպատակին: Գարեգին Ա-ի դեպքում, ալամ աշխարհը գիտե, թե նրան Անթիլիասից բերեց օրվա նախագահ Լեւոն Տեր-Պետրոսյանը: Իսկ այսօրվա գահակալի եւ Կա Գե Բե-ի առնչությունների մասին եկեք այս պահին չխոսենք ... հօգուտ նույն այդ գահակալի:

2. Հրապարակման մեջ կարդում ենք, որ, ըստ Գեւորգ եպիսկոպոսի, նշված նախաձեռնության մեջ կա «աղանդավորական տարր. դա մարդկանց մի խումբ է որը գտնվում է Կորյուն աբեղայի աղանդավորական ազդեցության տակ»: Մի քանի տող ներքեւում ասված է, որ այդ մարդիկ «աղանդավորական գաղափարներով են առաջնորդվում»:

Սա վկայում է շատ տխուր փաստի մասին` կա՛մ տգիտություն, կա՛մ էլ խեղաթյուրում. երկուսն էլ ԱՆԸՆԴՈՒՆԵԼԻ ԵՆ նույնիսկ սովորական մարդու համար, ուր մնաց` եպիսկոպոսի աստիճանին հասած սքեմավորի:

Նախաձեռնության անդամների հետ շփվել, հաճախ ամբողջ օրեր եմ անցկացրել վերջին 35-40 օրերին, եւ աղանդավորական որեւէ նշույլ չեմ նկատել: Ոմանք հնարավոր է, որ նախաձեռնության անդամների օրական մի քանի հավաքական աղոթքները մեկնաբանում են իբրեւ աղանդավորության դրսեւորում: Ցավոք սրտի, երբ նույնիսկ Մայր տաճարում ժամերգություններին ներկայանում են հատուկենտ միաբաններ կամ Հոգեւոր ճեմարանի սաներ, նման հավաքական աղոթքները, բնականաբար, պարզ ժողովուրդի անգիտակից, մեծ մասը ընկալելու է իբրեւ աղանդավորության դրսեւորում, ինչի լարի վրա էլ խաղում են օրվա գահակալին եւ ոչ Եկեղեցու իսկական գլուխ Քրիստոսին երկրպագող սքեմավորները:

Ըստ Հայ Եկեղեցու դավանության լավագույն մեկնաբաններից երջանկահիշատակ Զարեհ արք. Ազնավորյանի` աղանդավորը նա է, ով չի ընդունում մեր Եկեղեցու Հավատո հանգանակի դրույթներից թեկուզ մեկը (օրինակ` Քրիստոսի կամ Սուրբ Հոգու աստվածությունը, Քրիստոսի խաչելությունն ու հարությունը, մեղքերի քավությունն ու թողությունը, վերջին դատաստանը, եւ այլն): Նախաձեռնության անդամների ելույթներից ՈՐԵՒԷ ՄԵԿՈՒՄ որեւէ մեկը չի կարող գտնել Հանգանակի դրույթների ժխտման նշույլ անգամ: Իսկ եթե մի քիչ խորը նայենք, իրականում աղանդավորը հենց գեւորգեպիսկոպոսներն են, որոնք չեն հավատում այդ դրույթներից մեկին` ԸՆԴՀԱՆՐԱԿԱՆ ԵՎ ԱՌԱՔԵԼԱԿԱՆ ՍՈՒՐԲ ԵԿԵՂԵՑՈՒ ՄԵԿՈՒԹՅԱՆ: Վերցնենք միայն Մայր Աթոռի պարագան: Կոստանդնուպոլսո պատրիարքական տեղապահ ընտրված Գարեգին արք. Բեկչյանին Մայր Աթոռի գահակալի օրհնությունը Արթին Աթեշօղլուի (ծանոթ է իբրեւ Արամ արք. Աթեշյան) կողմից ոտնատակ տալը` արդյոք վկայո՞ւմ է մեր Եկեղեցու մեկության մասին: Երուսաղեմի պատրիարք Նուրհան արք. Մանուկյանի (որ նաեւ Գերագույն հոգեւոր խորհրդի երկու ատենապետներից է) ՀԻՆԳ ՏԱՐԻ չգալը Մայր Աթոռ` արդյոք վկայո՞ւմ է մեր Եկեղեցու մեկության մասին: Նվիրապետական մյուս Աթոռներից եպիսկոպոսների եւ ավելի ստորադաս հոգեւորականների չիջեւանելը Մայր Աթոռում` արդյոք վկայո՞ւմ է մեր Եկեղեցու մեկության մասին: ՈՉ: Հետեւաբար, գեւորգեպիսկոպոսներն ու նրա նմանները չեն հավատում մեր Եկեղեցու միության, ուստի, ըստ Զարեհ Սրբազանի մեկնության, աղանդավոր են ըստ էության:

3. Գեւորգ եպիսկոպոսը հայտարարում է, թե դիվանատուն մտած անձերից ոմանք «գտնվել են թմրանյութի ազդեցության տակ. հարուցվել է քրեական գործ», այստեղից էլ անմիջական եզրակացություն` «Խմբի իրական դեմքը բացահայտվում է»:

Պետք է արժանին մատուցել Գեւորգ եպիսկոպոսին, որ նույնիսկ քաշքշուկի ժամանակ հնարավորություն է ունեցել անվրեպ մարգարեանալ դիվանատուն մտած անձերից մի քանիսի «կայֆի» ազդեցության տակ լինելը: Ի~նչ հետաքննություն, ի~նչ բան. մարդը հենց առաջին հայացքից իմացել է ամեն ինչ: Առաջարկում եմ ՀՀ ոստիկանությանը` համապատասխան լաբորատորիայի ու նրա աշխատակիցների պահպանման փոխարեն բավարարվել գուշակ-մարգարե Գեւորգ եպիսկոպոսին իր մոտ աշխատանքի ընդունելով:

Հիմնավորելու համար այս հերյուրանքը, սույն եպիսկոպոսը վկայակոչում է թմրանյութի հայտնաբերումը դիվանատան շենքում: Այո, շենքում, դիվանապետի մերձավոր ոստիկաններից մեկի հավանական մեղսակցությամբ, տարածք մի քանի րոպեով մտած երեք հոգու սադրանքով, դիվանատունը գտնվողներից մեկի պայուսակում «պատահաբար» հայտնվեց անհայտ ծագման մի նյութ: Դիվանատանը գտնվողների ՍՏԻՊՈՂՈՒԹՅԱՆ տակ, շենքում հերթապահող ոստիկանները հրավիրեցին քննիչի, որի համապատասխան աշխատանքից հետո հարուցվեց քրեական գործ: Նախաձեռնությունը տեսագրել է այս բոլոր իրադարձություններն ու տարածքում հայտնված երեք անծանոթների դեմքերը: Նախաքննությունը հազիվ սկսած, Գեւորգ եպիսկոպոսը, ինքն իրեն վերագրելով քննիչի, դատախազի եւ դատավորի գործառույթներ, արդեն եզրակացություն է կատարում` ոտնատակ տալով նաեւ անմեղության կանխավարկածի պահանջը: Լավ կլիներ, որ դիվանատան շենքը տնօրհնեքով վերստին «մաքրելուց» առաջ, նման հերյուրանքներ տարածող սքեմավորները իրենց հոգիները մաքրեին մեղքերից:


    Լրահոս
    Քաղաքականություն
    Փաշինյանը բանակցություններ կհրավիրի քաղաքական ուժերի հետ` քննարկելու խորհրդարանական արտահերթ ընտրությունների ժամանակացույցն ու պայմանները
    Օրացույց
    Ամենաընթերցված
    Եկեղեցական օրացույց
    /