Կայացավ ՌԱԿ Գերագույն խորհրդի հերթական հավաքը

am en es
kayacav-rak-geragouyn-xorhrdi-hertakan-havaqe

Ռամկավար Ազատական Կուսակցութեան Գերագոյն Խորհուրդը այն մարմինն է որ կը կամրջէ կուսակցութեան սփիւռքեան կառոյցը հայաստանակեդրոն Կեդրոնական Վարչութեան հետ:

Ապրիլ 12-13 շաբաթավերջին Գերագոյն Խորհուրդը իր հերթական նիստը կայացուց Նիւ Ճըրզիի մէջ, մասնակցութեամբ բոլոր երկիրներու եւ շրջանակներու, ներառեալ Հայաստանի երկու ներկայացուցիչներու:

Երկօրեայ ժողովը քննարկեց բաւական լուրջ եւ ծանրաբեռնուած օրակարգ մը: Նախ վերլուծական քննարկումի ենթարկուեցան Հայաստանի եւ Կովկասի քաղաքական զարգացումները, թաւշեայ յեղափոխութենէն ի վեր: Նոյնպէս գնահատման ու քննարկման ենթարկուեցան նոր իշխանութեանց ներքին եւ արտաքին քաղաքականութեան ձեռքբերումները: Քննարկման յատուկ օրակարգի նիւթ դարձաւ մանաւանդ Արցախի հիմնախնդիրը՝ քաղաքական ներկայ իրադրութեան լոյսին տակ:

Վերոնշեալ քննարկումները առաջնորդեցին ժողովականները որոշելու կուսակցութեան դիրքաւորումը տուեալ քաղաքական զարգացումներու նկատմամբ:

Ժողովը գոհունակութեամբ արձանագրեց կուսակցութեան առաջընթացը վերջին կիսամեակին՝ յատկապէս լայն թիւով նորագիրներու անդամագրումով: Եւ մշակեց յատուկ քաղաքականութիւն՝ նոր դիմումներու նկատմամբ: Կուսակցութեան շարքերը համալրող տարրերը առաւելաբար կը պատկանին երիտասարդ եւ կայացած դասակարգին: Այս նոր դիմումները եւ շարքերու լրացումները կու գան անգամ մը եւս հաստատելու ժողովրդավար-ազատական (լիպերալ-տեմոքրատ) գաղափարականին տեղն ու ամրապնդումը Հայաստանի քաղաքական համապատկերին մէջ:

Ժողովի կարեւոր օրակարգերէն մէկն էր նոր ծրագիր-կանոնագրի մշակումը՝ հիմնուած Հայաստանի սահմանադրութեան տուեալներուն եւ կուսակցութեան սփիւռքեան կառոյցներու գործակցութեան համադրութեան վրայ:

Օրակարգի վրայ էր նաեւ քննարկումը կուսակցութեան մամուլի օրկաններուն: Գնահատանքներ արձանագրուեցան կուսակցութեան մամուլի այն օրկաններուն մասին որոնք առաջատար դիրքերու վրայ կը գտնուին հայրենական եւ սփիւռքեան չափանիշերով: Առցանց մամուլի բնագաւառէն ներս աննախընթաց յառաջխաղացք արձանագրած է «Հայ Ձայն»ը, որուն յառաջիկայ զարգացման նպատակով նոր ծրագիրներու յանձնառու եղաւ Գերագոյն Խորհուրդը:

Որոշուեցաւ կուսակցութեան պատգամաւորական ժողովը կայացնել ընթացիկ տարուան մէջ անմիջապէս որ ամբողջանան ծրագիր-կանոնագրի մշակման աշխատանքները:

Մինչեւ պատգամաւորական ժողովի գոյացումը, միջանկեալ շրջանին համար Գերագոյն Խորհուրդի դիւանի ատենապետութիւնը ստանձնեց ընկեր Դոկտ. Հրաչ Գույումճեան իսկ փոխ ատենապետութիւնը՝ ընկեր Յակոբ Վարդիվառեան:

Ժողովի աւարտին կայացաւ ընկերային հաւաքոյթ որուն ընթացքին լուսաբանութիւններ տրուեցան շրջանային ընկերներուն եւ պարզուեցան քաղաքական կարգ մը ծրագիրներու բնութագրերը:

Լրահոս

Ամենաընթերցվածը

Նմանատիպ նորություններ